Ẹ GBÈWE LÁYÈ

Bọ́mọdé dìde tó fẹ́ẹ́ kéwú

Wọn a ló kéré

Bẹ́sọ́ wẹ́rẹ́ ń fèdè ìmàrò fọ̀ tó ń gbàdúrà àtàtà

Wọn a ní ó gbẹ́nu sọ́hùn-ún

Bí rèwerèwe lórin tó fẹ́ẹ́ kọ fún wa   5

Wọ́n a ní ta ni ń jẹun, tájá ń jùrù?

Ẹ ẹ̀ sì gbèwe náà láyè

Ayé yìí ì í màá ṣe tẹnìkan

Ọmọdé tó fẹ́ẹ́ kéwì, ó mọhun ó ní ńnú

Ọmọ pínnísín tó fẹ́ẹ́ sọ̀rọ̀ àtàtà          10

Ó mọhun ó dì síkùn

Ibi ó ti yanrí ìwọ lè mọ́ yàn ńbẹ̀

Ó  ṣeé ṣe kó ti kọ́gbọ́n wá látoyún inú

Ó ti lè mọ́gbọ́n tọ̀run bọ̀ láìròtì

Àbẹ́yin ò fìtàn Àjàntálá ṣẹ̀kọ́             15

Tó sòrò ńjọ́ tá a bí i

Torí náà tẹ́ ẹ bá rọ́mọdé

Tó ń gbìdánwò

Tó ń tiraka

Ń ṣe ni ẹ ràn án lọ́wọ́              20

Ó níhun-unre tó fẹ́ẹ́ sọ ni