Ẹ FINÚ TÁN AYA

Bá a bá ráya wa pẹ̀lọ́kùnrin

Ṣe là á pajú dà dárayá

Tá à á kọtí ọ̀gbọn-in sírúu wọn

Kó má fajàngbọ̀n lọ́wọ́

Kó má fa họ́wù lẹ́sẹ̀                          5

Kó ṣe bẹ́ẹ̀ tú yìgì tá a so                         

Ó yẹ á finú tán aya ẹni

Gbogbo ibi tó bá bọ́ sí náà kí ń ti ń ṣebi

Nígbà tí è é ṣajá tí è é ṣẹlẹ́dẹ̀

Ọkùnrin tó o rí pẹ̀lú ẹ̀ lẹ́ẹ̀kan            10

Lè máa bá a sọ̀rọ̀ àtàtà                      

Ọ̀rọ̀ tí tẹ́yin méjèèjì ó fi dáa

Tí ó fi yẹ yín kalẹ́, tẹ́ ẹ̀ ní í ṣe é tì

Ayé àtijọ́ ni wọ́n ti ń sọ pé

Tópẹ́ bá fi máa dọpẹ́lọpẹ́ ìyàwó ẹni, ohunkóhun míìn tá a bá rí ni ká ṣe 15

Ìyẹn ò sí mọ́ ìyẹ́n ti lọ                         

Tọkọ taya ló ń fọwọ́ọ́ kún un tó fi ń dórí 

O ṣe wáá rọ́kùnrin pẹ̀láyaà rẹ

Tó ò ń fajúro, o sì wáá dì bí ẹni ọ̀fọ̀ ṣẹ̀

Pé                                                               20

Bàtá tó ń ké láké jù

Ń ṣe ló fẹ́ẹ́ bẹ́                          

Aya tó gúnyán fún wọn

Rokà fún wa

Ń ṣe ní ó lọ                                                 25

Bí ẹni pé kè é ṣẹnìkan ló fún ọ fẹ́,

Ẹwúrẹ́ tilẹ̀ ni tàbádìyẹ?                     

Tó o fi ní ò gbọdọ̀ yọ́ tẹ́rẹ́

Kò gbọdọ̀ jáde, kò gbọdọ̀ bọ́ ẹ́ẹ́kùnlé

Má-su-má-tọ̀; òfin agbẹ̀sìn sódì                            30

Ọ̀rọ̀ yìí kò kúkú yé ọ délẹ̀ ni

Ikùn àgbà níí mì, ẹ̀nu ẹ̀ è é mì          

Ó mú mi rántí ọmọ ọ̣̀dọ̀ ọ̀rẹ́ẹ̀ mi kan

Tó ti ń mu sìgá ọjọ́ ti pẹ́

Ó ti ń mu katabá ọ̀ná jìn                                      35

Ṣùgbọ́n kò jẹ́ kọ́gàá ẹ̀ ó mọ̀ ńlé

Ó wáá dijọ́ kan wàyíò              

Ọmọ ń já sìgá bọ̀ fòò, ó ń fèéfín ságbárí

Kò mọ̀ pọ́gàá òun ń bọ̀ nísàlẹ̀ ibìkan

Pẹ̀kí tójú ṣe mẹ́rin tountọ̀gá ló sọ sìgá nù sínú igbó                 40

Sìgá figbó ṣelé, tibí ń bẹ lẹ́nu

“Àwé ibo lo ti ń bò? Ibo lo ń lọ?”    

“Ìsàlẹ̀ Ọjà ni mo ti ń bọ̀, tí mo ní kí n gba Mọ́kọ́la yọ sílé”

Èéfín ń  sọ kùù bíi Ṣàngó gbìjà

Erukutu gba gbogbo orí bíi tọkọ Ọya                  45

Bó ó ṣọkọ ìyàwó tí mò ń sọ lẹ́ẹ̀kan

Á á faraya, á á pariwo                       

Àsìkò téèéfí gbalẹ̀ bíi tọba Kòso

Ẹ̀fọn tó bà lé ọ̀gá lẹ́sẹ̀ lọ̀gá ń fọgbọ́n-ọ́n lé

Térukutu fi lọ lórí ọmọ iṣẹ́ rẹ̀                      50

Ọ̀gá ò ṣe bí ẹní rí nǹkan

Kò tilẹ̀  yán ọ̀rọ̀ wò ńgbà ó délé                             

Ń ṣe ló ṣojú fúrú tó fọ̀rọ̀ ṣe mọ̀-ọ́nnú

Àwé, ire ó wà nínú ibí pọ̀ tó ò bá mọ̀

Sìgá yìí ló ṣàmumọ fọ́mọ iṣẹ́ arútúú jayé             55

Ó fọ̀wọ̀ fọ́gàá, ó pa sìgá tì láéláé.

N ni mo ṣe ni                            

Bá a bá ráyaa wa pẹ̀lọ́kùnrin

Ká pajú dà ká dára yá

Bó ṣohun ibi ló ń ṣe                                             60

Kó lè fì yẹn ṣàṣemọ̀