BÀÁMI Ń ROKO ỌDẸ

 Bàámi ń roko ọdẹ lálẹ́ òní

Àpò tó kún fọ́fọ́ nìyáà mí dì  fún àgbàdo sísun òun ẹ̀sun iṣu

Pẹ̀lú ata, epo àtohun èròǹjà yòókù

Fún ìrìnàjò àdánìkànrìn-in  rẹ̀ yìí

Nínú igbó dúdú                       5

Igbó òruru

Bàámi ń roko ọdẹ lálẹ́ òní

Páá báyìí nìyáà mi múra

Tó lọ oríibùsùn-un rẹ̀ lọọ fìhà lé

Tó ń fòyà, tó ń gbàdúrà                   10

Tó ń ṣàìsùn àìròtẹ́lẹ̀

Torí ọkọ tó ń rebi

Àṣóòótọ́ ni wọ́n ń sọ

Pé ọkọ́ tóbi jọjọ lọ́wọ́ aya

N ò tètè mọ̀                           15

Bàámi ń roko ọdẹ lálẹ́ òní

Ọ̀pọ̀ ìgbà lagbára tó ń sà

Máa ń já sí òtúbáńtẹ́

Òjò á pa á, ìṣẹ́ á ṣẹ́ ẹ

Àwọn ìrì òjò bíi bọ́mbù                      20

Wọn a wẹ̀ ẹ́ kanlẹ̀ wẹ̀ẹ̀ẹ̀

Òtútù á dé, a sì máa gbọ̀n

A máa gbọ̀n rìrì bíi tojú omi

Ìdààmú ìpayínkeke ọ̀tọ̀

Eyín á lura bí irin                     25

Ní òun nìkan dáyá

Nínú igbó òruru

Bàámi ń roko ọdẹ lálẹ́ òní

Àwọn ọ̀gọ̀rọ̀ èèyàn sì ti kẹ́nu jọ

Láìsági lógbẹ́, láìtàgùrọ̀ lọ́fà              30

Wọ́n ń retí ẹran ọ̀fẹ́

Ọ̀fẹ́ ní í ro

Àbí ẹ̀yin ò mọ̀ pé

Ọta ìbọn kan tí ẹ gbọ́

Tó ró kììì lálẹ́ àná                     35

Ó lè jẹ́bọn tó yìn

Nígbà tó gbéná ọdẹẹ  rẹ̀

Tó tàn án yààà

Sí ojú tí ó rí tó ń dán

Láìmọ̀ pé ojúu kòtónkan ni             40

Fẹ̀pà ṣe pósí eku èlírí.