ARÉDÈ

Níjọ́  mo relé arédè

Ọkàn mí gbọgbẹ́

Ọkàn mí gbàròkàn

Èṣù èwo ló mú irú èyí délẹ̀ wa

Tí ń faya ṣolú ọkọ ?                5

Tíbi a pè lórí dibi à ń fi tẹlẹ̀

Àwon Òyìnbó tó làṣà yí tẹ́lẹ̀ tẹ́lẹ̀ tẹ́lẹ́ẹ́rí

Wọn ò ṣe tó tiwa, èyí gbàrà ọ̀tọ̀

Kí ọkọ mórógùn wá, àbí kinla!

Kí ó fọgbá, kó fọ àwo, kó fọ̀kòkò baba ìsáàsùn                                 10

Àbákú laṣọ awo, à bó a ti wí?

Ọkọ kan, aya kan! Nílẹ̀ yí náà?

Tá a bá fẹ́ẹ́ gbágbo ijó, ta ni yóò bá wa jó o?

Tá a bá fẹ́ẹ́ ṣèpàdé àkòdì, ta ni yóò bá wa yẹ̀díẹ̀ wò?

Ta ni yóò bá wa káta?                       15

Ẹ̀gúsí ń kọ́ tó so dọ̀ọ̀mì sébè?

Gbogbo àwọn ṣọkọyọ̀kọ̀tọ̀ tí ń bàjẹ́ láàlà ń kọ́?

Ta ni yóò bá wa fẹ́ wọn?

A tún ní o ṣiṣẹ́, o fajú ro

Pé n mówóo yẹti wá, owó aṣọ àtowóo bàtà ẹsẹ̀                                 20

Lẹ́yìn ìgbà tí mo ti sanwó orí, tí mo san tilé, tí mo san tọ̀nà

Ṣémi lò tún ń larúkọ mọ́ lórí, ìyáa lágbájá?

O ti kí mi láàárọ̀ yí ná à bá a jà tì?

Wọ́n ní bí mo bá kú bí mo bá lọ, ìwọ lo logún-ùn mi, ìyẹn ṣèèwọ̀

Tẹbí tará là wá mọ̀ tíí  píngún nílẹ̀ẹ tàwa                                  25

Ǹjẹ́ àsìkò náà tó tí n ó pariwo tí n ó sọ̀rọ̀ kàn

Arédè yí ò wù mí n ò so yìgì

Bí mo fáya sí Pọtá, ma fẹ́ sí Ará, ma fẹ́ sí Kútíwenjí

Irú èyí ló lè tètè fa ìsọ̀kan ilẹ̀ẹ wa pọ̀ láìròtì

Kárìn ká pọ̀ bí ìlú là á rí                               30

Àrìnpọ̀ ló wù mí, n ò fáya kàn ń tèmi