ÀÁRÍN AGBAMI

Omi ń bẹ níhìn-ín, omi ń bẹ́ lọ́hùn-ún

Síbẹ̀, a ò ríbi tukọ̀

Omí yí wa ká tilé toko

Síbẹ̀, a ò réyìí à á bù mu

Ẹní sùn sídìí òro ò róro jẹ                           5

Ẹni tó jí dé ló fòro ṣàjẹtì

Olúwa bùn wá níyán bùn wá lọ́kà, síbẹ̀ ebi ń pani

Ẹní gúnyán ò rókèlè

Ọ̀rẹ́ẹ wa tó lémi ni wọ́n ń ṣe ńbẹ̀un?

Ló ń jàjẹ yó jàjẹ ṣẹ́kù                10

Kí lànfààní olówó tí ò níyì?

Kí lànfààní ẹni a bágbé tí ò gbádùn ẹni?

Wọ́n lépo ń bẹ ńlẹ̀ẹ wa là ń gbọ́

Kòbákùngbé ọ̀rọ̀

Ọ̀wọ́n gógó là ń rahun ìwakọ̀                       15

Ọ̀pọ̀ kúù làwọn ará òkè ń repoo wa

Epo tá à ń ràá wakọ̀ ńlẹ̀ yí lókòó owó

Odoó làwọn ń mórókún-un wún-úndíá ti wọn

Bẹ́ẹ̀ àwa la sì lọ rèé gbé e fún wọn

N ò madùn-un orógbó tá a jẹ tó korò

A pa á kò láwẹ́ òòṣà tá a fi ń bọ iná ní ń yọ lẹ́nu                      20

Wọ́n ní kiní ọ̀ún pọ̀ bíi gaàrí ọmí

N gbọ́ mẹ̀kúnnù, kè é ṣetí lásán lẹ i gbọ́ ọ?

Fírí ojú lẹ i rí i, ètèè yín ò bà á

Ó bùse wọ́n ní kò pọ̀ mọ́

Bí ò tilẹ̀ pọ̀, ǹjẹ́ kò tilè yẹ̣ á já a jáá jàà jáá             25

Kó káríi gbogboo wa láìfo ẹnìkan ru

Kí olóko ó pọ́nlá, ká má gbàgbé àgbẹ̀

Ẹ dákun ẹ bá wa gbọ̀rọ̀ yí wò

Ó ṣẹ̀ẹ̀ wá ń kàyééfì ó ń lé góńgó

Kódà, kiní ọ̀ún ò ṣẹ mọ́