AÁFÍRÍKÀ O KÚ Ọ̀FỌ̀

Mo kólá, mo kálùbọ́sà, mo kó rodo

Mo táwọ́ sáparò; ò dunbẹ̀ dunmi

Ẹni tá ò fẹ́mọ lọ́wọ́ ẹ̀ tí ń gbàna lọ́wọ́ ẹni

Mo nawọ́ sí étu onítan-án pe ogún ẹrú

Oníkìísẹ̀ẹ́ pe ọgbọ̀n ìwọ̀fà; tíi fi gbogbo araá pe aláàrú tan tan tan             5

Mo ṣe bí gbogbo wọn ó jẹ́mi ísè lọ́bẹ̀

Ṣùgbọ́n ibi mo fojú sí, ọ̀rọ̀ ò gbabẹ̀

Irú à bá fi jíyìn ọbẹ̀, ekú gbé e lò

Ògìrì ọbẹ̀ tún nihún ti fọ̀n rè

Ǹ̀jẹ́ kí n rèé wáyọ̀ bóyá yóò ṣeni níre                            10

Mo dúró, owọ́ọ̀ mi ò to

Mo bẹ̀rẹ̀, owóò mi ò kàn

Mo wáá fọ̀rọ̀ kan lọ̀ yín, emi ní ń ṣe?

Bọ́rọ̀ bá ṣe bí èyí díjú, àgbà là á pè

Mo wáá sáré títí, mo re Kóńgò        15

Pé wọn ó bá n pe Lùmúńbà eni ire

N ni wọ́n sọ fún mi pÉjìẹ́ ti mú un lọ

Èjìẹ́ kẹ̀? Emi n wọ́n ní ó ṣe?

Kí la ó ti ṣèyí sí o, Èdùmàrè?

Wọ́n ní kò kúkúu mọ́tò, kò kúkú omi                           20

Wọ́n níkú ọta ló kú, lọ́wọ́ aṣekúpani

Ẹ̀rú bà mí, àyá fò mí, ọkàn mí gbò jìgì

Mo ṣọkàn ọkùnrin, mo forí lÉtópíà

Pé n lọ rèé rí Sàlásì ní fẹ̀rẹ̀fẹ̀rẹ̀

Wọ́n ló tún ti ṣe tán filẹ̀ bora bí aṣọ 25

Ọmọ awo kò fọ̀ sẹ́nìkan té e lọ

Té e lọ àjò àrèmabọ̀

Mo níkú tó pa ọ́, àwé, ikú òún ò ṣèèyàn

Ikú ọ̀ún ò ṣé-e-re

Mo múra pàá ó dilẹ̀ Àgànyìn          30

Pé n lọọ fojú kan Kúrúmọ

“N gbọ́ Kúrúmọ ń bẹ ńlé àbó ròde?

Wọ́n dákẹ́, wọn ò dáhùn, wọn tiiri bí omi

Mo lémi lódé, ẹ yára dá mi lóhùn lóhùn kan

Wọ́n níkú ti ṣebi, ikú ti ṣèkà                        35

Ikú ti mẹ́ni ire lọ tèfètèfè

Omí bọ́ lójúù mi pòrò pòrò bí ọmọ-ékeé

Torómi ojú la fi ń rántí ẹni ńlá

Ìké pàtàkì la fi ń rántí ẹnì ó wùùyàn

Omijé ni n ó máa fi rántíi Kúrúmọ    40

Ǹjẹ́ tá a bá ròkun, tá a bá rọ̀sà, ilé là á fàbọ̀ sí

Mo ní n wáá fàgbo ilé rẹmọ n ké sí Múrí

Múrí ọmọ arógunjó, ọmọ arógunyọ̀

Ẹni tó síntọ́ sààràrà lásán

Té e pẹgbẹ̀rún èèyàn nílẹ̀ Kóńgò níjọ́sí                 45

Mo mọ́nà pọ̀n, ó dÈkó pé n fojú kọmọ-ọn Lámọín

Mo débẹ̀ ni mò ń gbọ́ gbàù gbàù

Emi ó ti ri, emi ó ṣe?

Ogun Àdùbí nì yí àbí ti Kírìjì?

Ìbọ́n rọlẹ̀ ni mo wọlé, nǹkan ti ṣe               50

Gbogbo ọgbọ́n tá a ní ti lọ́ mọ́ wa lówọ́ lÁáfíríkà

Aáfíríkà o mà kú ọ̀fọ̀ o 

O kú ọ̀fọ̀ àwọn ọmọ-ọ̀n rẹ

Tí gbogbo wón kú, tí gbogbo wọ́n lọ 

Ká  tóó tún rérin, ó digbó àwé                             55

Ká tóó tún réni bí ìwọ̀nyí, ó dọ̀run alákeji

Ó ṣe púpọ̀ fún ọ Aáfíríkà

O ò ní í rábìíkú àgbà mọ́ - àṣẹ

Kólúwa ó wọmọ fún ẹ - ẹ ṣàmín ẹ̀