ŃDÓJI

Ẹni tí ò kọrin ajé ìí jèrè

Ajé, dákun, jẹ́ n jèrè

N lorin wa nínú ilée wa nígbà ìwá ṣẹ̀

Ó wá mú mi rántí ọ̀rọ̀ tó ṣẹ̀ nígbà kàn

Erin wó, àwọn orúsagila ń yọ sagila            5

Ńdóji dé, afọ́nwókáyé

Gbogbo ayé kọrin ajé wọ́n jèrè

Bí wọ́n ti ń dójì níbí

Ni wọ́n ń dóji lòhùn-ún

Gbogbo irùgbọ̀n òtòsì bí ìgbálè lánàá  10

La jí lónìí ló ń bẹ yẹbẹ tó sì ń wu ni

Àṣówó tí ò bá bójú ọjọ́ wọlé bẹ́ẹ̀ ní í rí

Kẹ́ ẹ wá wo pẹpẹyẹyẹ tatagun-anran

Àwọn ènìyàn ná wábiwọ́sí owó Ńdóji

Àtohun ó tọ́ àtèyí ò tọ́                      15

Ṣówó sáà ti wà

Ká máa náwó lọ ńtiwa ni

“Ọmọ aláta, kọ́bọ̀ kan kó o pè é? Gba kọ́bọ̀ mẹ́fà”

Ẹ̀yìn là á nájà sí rí, iwájú ló kàn

Owó ti dé, ká máa ṣowó bó ti wuni ni                            20

Gbogbo wọ́n wá ń jóókọ nínálowó, orúkọ ọmọ ọlọ́mọ

Wọ́n já àwọn ọlọ́jà léèékán, àwọn náà ti gbọ́

Gbogbo ohun wáá gbówó lérí ge gee ge

Owó pọ̀, ọjà wáá kéré

Gbogbo nǹkan wá ròkè                      25

Ṣé tí lálá bá ròkè, a sì padà wálẹ̀

Bíi tọjà ilẹ̀ẹ wa kọ́

Ọjà tó ròkè kò sì káwọn èèyàn lọ́wọ́ kò

Ohun ribiribi la tún ń ṣe

Ìgbàwo ni bàbà àgbá kú ná?                        30

Ǹjẹ́ kò ti fẹ́ẹ̀ kádún?

Ẹ̀̀gbẹ́ ó ti máa ro ó, ó yẹ n pa á da ó tóó kẹ̀                        

Kí baba ẹni ó fire fún ni

Ǹjáya mẹ́fà pére tilẹ̀ yẹrú àwa báwọ̀nyí?

Jọ̀wọ́ ba n fi lọ̀ bó o délé                              35

Pẹ́ni tó lówó fẹ́ẹ́ fáyaa re

Àná ni mo sọmọ yìí lóókọ

Ó tún tóó gbà míìn

Bó bá tún dọjọ́ ajé

A tún máa tóókọ ọmọ sọ                            40

Tàwọn èyí ò dùn míí pọ̀

Bí àwọn tó sun Ńdóji níná

Rírú táwọn èyí rù

Wọ́n kúkú mohun wọ́n fara ṣe

Àwọ̀n tọ̀hún gọ̀ a à rírú ẹ̀ rí                45

Kódà, ẹnu ni wọ́n fi ń họra

Wọ́n ra fìlà tán wọ́n tún ń yọwó ìtẹ́nú

Ọ̀kan lọ kówó Ńdóji fáwọn ṣogúndogójì

Ó fẹ́ẹ́ sọ ọ́ dirún digba

Ẹni ń wáfà ń wófò                    50

Gẹ́gẹ́ bí òwe àwọn àgbà

Fúẹ́ bí afẹ́fẹ́ ni owó tó níye ṣe lọ

Wọ́n ní ẹni kan ta púù kò jẹ páà

Mo nírọ́ ni

Wọ́n lẹ́nit a tẹ́tẹ́ kò jẹ                          55

Mo lé ṣèèwọ̀

Mo ní a kì í ta tẹ́tẹ́ ká má jeẹ

Ẹni tí kò jẹwó a sì jẹ gbèsè bọ̀ ibẹ̀

Ọ̀kan ra tatapùpù tí kò gùn rí lọ́jọ́ aráyé ti dáyé

Àwé jọ̀wọ́ jẹ́  n y ẹàdá ẹ wò ni wọ́n fi gbàdá ọwọ́ àgbẹ̀ lọ                            60

Torí kò sí nọ́ńbà kò síhun a fi lè dá tapùpù mọ̀

Ńdóji gbólé dé, olé gbàgboro

Bí wọ́n ti ń kólé ńlé ni wọ́n ń kó lóko

Èèyàn ò wá lè dá rìn mọ́ láìpé mẹ́fà

Nítorí owó wọ́n fọ́n kale tó kóhun ibi báni                               65

Ẹ ò jẹ́ á rọ̀rọ̀ wò lọ́jọ́ míìn ọjọ́ọre

Ká tóó fánwó jáde tí yóò kó báàyàn