ÌJÀA DÁNFÓ

Ẹ̀rín pa mí ńjọ́ à ń wí

Ọ̀̀rọ̀ ò wọ̀

Ìdò ni mò ń lọ látÌdúmọ̀tà

Tí mo dá dáńfó dúró

Àwa mẹ́ta la wọkọ̀ yìí             5

Mo gbàgbé n yán an fún ẹ

Èmi ṣení 

Omidan ọlọ́rùn-un jọ̀lọ̀ ṣèjì

Abilékọ olójú ẹgẹ́ ṣẹ̀ta

N là ń lọ, n la ń lọ, n là ń lọ                       10

La débìkan, lèró p̣é pìtìmọ̀

Èrò ọ̀ún pọ̀ bí ewé orúmọ̀, a ò rírú ẹ̀ rí

Tí gbogbo wọn figbe Àkọkà bọnu

Ṣówó gọbọi ni wọ́n ń wọkọ̀ Àkọkà lọ́jọ́ òun àná

Èyí náà ló kúkú wọlọ́kọ̀ lójú lọ́jọ́ ọ̀ún o jàre                            15

Tó forin ajé sẹ́nu kó lè jèrè

Pẹ́ni ò bá kọrin ajé è é jèrè

“Ajé dákun jé ń jèrè”

Àgbàdo ìgò wáá bọ́dẹ níjù, ó doyin mọmọ

N làwé bá ní á sọ̀, kí  á gbowóo wa        20

Kí a wọ́kọ̀ míìn wọ̀

Àwa mẹ́ta la wà lọ́kọ̀, èrò sì ré ńlẹ̀ yìí

Gbogbo yín lẹ kúkú mọ̀ péèyàn tútù ni mí, n ò fẹ́jà

Mo taari àbìlíì síwájú

Ṣùgbọ́n àwọn obìnrin méjì yìí fárígá, wọ́n faraya                      25

Àwọn là bá máa pè lóbìnrin-kọ̀yà

Àtèyí ọ̀pẹ́lẹ́ńgẹ́ tó jábilékọ

Àtọmọge abìdí jìwo

Gbogbo wọn ni wọ́n ta pańpa

Tí wọ́n ń ra fańda                    30

N ò mọ̀ pé torí ìjà ni wọ́n ṣe dárùgbọ̀n sí

Tí wọ́n sọraa wọn dỌya kalẹ̀

Ìjà ọ̀ún pọ̀ ńjọ́ ọ̀ún, ọ̀rẹ́ẹ wa

Leruku ń tu, táriwo ń ta gèè.

Gbogbo aṣọ ara baba ni wọ́n ya kanlẹ̀ kanlẹ̀                            35

Ìgbàa wọ́n tiwọ́ bọ pátá tó kù sídíi baba

Tí wọ́n fẹ́ẹ́ yọjú ẹlẹ́kẹrú sóde

N ni mo pẹ̀yìndà

Tí mo gbọ̀nà ilée mi lọ

N ò ní í réèmọ̀!                         40