BÁÁSÍ ẸRAN KAN

Èyí  èé ṣètàn, ohun ojú rí la ń wí

Mo ní kèé ṣètàn, ohun a rí tó la ń sọ

Èmi kiní yìí náà ni kiní ọ̀ún ṣẹ̀ sí láìp̣ẹ́

Èmi ló ṣẹ̀ sí ni kò pẹ́ kò jìnà

Ṣé Yoòbá pẹ̀gàn ẹni tí ò lóbìn-in  5

Torí bí wọ́n rí ẹ lóde

Aya ni wọn ó kọ́ beerè ó tóó kan tọmọ

Òhun náà ni baba wa Sóbọ̀ ṣe sọ ọ̀rọ̀ kàn

Tó ní “Páàdì o tó yìí oò nóbìnrin, ó tàbùkù”

N ló dífá fọ́mọ Yoòbá                               10

Tí wọn è é fi í fi gbogbo ara

Pọ̀ rẹpẹtẹ níbi iṣẹ́ olúsọ́ Àgùdà

Wọ́ lỌ́lọ́run jẹ́ o torí obìn-in kú, o ò ṣàmín

Bó ò torí abo kú torí emi oó ṣe kú o jèe?

Bó o lówó tó dàbíi gbìngbìn-nì kìn  15

Emi ló o fowó ọ̀ún wá bí ò ṣọmọ?

Ibo lo ó ha ti rọ́mọ rà láìfẹ́bìin?

Béèyàn ò sì tilẹ̀ lówó lọ́ọ́

Yóò fẹ́bìn-in dandan ni bí owó orí àtaṣọ ìbora

Èmi sì ni yí, n ò lówó lọ́ọ́, kọ́bọ̀ ṣàgbàà mi                        20

Ọjọ́ sì ti ń lọ lórí, ọdún ṣẹ̀ ń kọjá ọgbọ̀n

Ẹ ni dákẹ́ tara rẹ̀ á ba dákẹ́

Ló jẹ́ n jí níjọ́ kan tí mo gbọ̀nà òde

Mo múlé onísogún dogójì pọ̀n

Mo dé ọ̀ún mo yírà sọ́tùn-ún, mo yírà sósì                                  25

Mo ní baba rere bàbá kẹ̀

Ẹ ẹ̀ sì yá mi lọ́gọ́rùn-ún  owó

Kí n fi gbáya wálé ní rọ̀ǹgbà

Babá wò mí tìkàtẹ̀gbin, n ò mọ̀ pá a níjà tì

Ó ní n gbéra ńlẹ̀ n dìde, mo sì gbà    30

Olúwa má fi wá lọ́táa wa lọ́wọ́, ẹ ṣàmín ẹ̀

Torí awọ fẹ́lẹ́ tó bonú ò jẹ́ á dáṣeni mọ̀

Ó ní n gbowó, mo ní èló lèlé bàbá?

Ṣégba ló dà àbọ́ọ̀dúnrún?

Ó ní ká má rí i òun ò ní í gbèlée kọ́bọ̀ lọ́wọ́ọ tèmi                                 35

Ó ní ká fọ̀rọ̀ ṣèfẹ̀ ká fi ṣàwàdà

Ó ní n ó ti rówó kó tó dèyí àmọ́dún

Inú mí dùn, ìfẹ́ n mo ṣe bí, n ò mọ̀

Pé ìfẹ́ a fẹ́ adìẹ ò dénú

Ó ní ṣùgbọ́n, tó bá dàmọ́dún, tí n kò bá rówó ọ̀hún gbé jù sílẹ̀                       40

N bòun mú báásí ẹran kan láraà mi

Èyí ò tilẹ̀ kò kọ mi lóminú, kò ṣe mí ní háà!

Mo rò pé kó tó dèyí àmọ́dún, ma rówó

Nítorí oko baba ń bẹ nílé, mọ́tò baba ń bẹ lọ́nà

Lásán ni n ò lóó lọ́ọ́, kè é ṣe pé bàámi ò là

Kò fẹ́ẹ́ fún mi ni                        45

Ó ló yẹ kọ́mọ náà ó f̣ọwó ṣiṣẹ́ ajé, mo sì gbà

Ọkàn mi tilẹ̀ sì balẹ̀ ní ṣáà yí

Ṣé wọ́n ní bá à ń jà, bíi ká kú kọ́

Bàámi ò ní í fi mí sílẹ̀ pé wọn ó fìyà jẹ mí láìgbà mí

N ni mo bá gbowó ni mo múlé aya lọ                                50

Mo ṣèyí ó tọ́ tán, mo tún ṣèyí ó yẹ pẹ̀lú

Mo gbówó orí, mo gbóbì ní gìdìgbà

Mo máya bọ̀ wálé

Ọ̀̀rọ̀ ìyàwó rọlẹ̀ tán kí nǹkan tóó ṣe

Ìṣẹ̀lẹ̀ yí ṣẹ̀, ó kọjá ti Jóòbù ní Bíbéélì                                  55

Ilée babá jó, okó run, ọkọ̀ ṣègbé

Ọ̀rọ̀ ọ̀ún dun ni, ó dùnìyàn jù

Torí kò sówó lọ́wọ́ kò sí kọ́bọ̀ lápò

Ọdún sì ti bù pé tán

Egbò ọ̀ún ṣajá lọ́ṣẹ́, orí ló ti mú un   60

Kò pẹ́ náà kò jìnà, baba olówó dé

“Owó tó o jẹ mi, o ò ní í san án ni, àbí mo jẹ ìran rẹ lówó tì?

Baba yarí pátá, ó tún fara ya

Wàràwéré ọ̀rọ̀ dọ̀rọ̀ ẹ̀bẹ̀

Mo ránṣẹ́ abẹ́lẹ̀ sí bàbá                              65 

Pé kó dákun dábọ̀ fiyèdénú

Kó fọjọ́ sọ́jọ́ owóo a jẹ

Bàbá kọ̀ jálẹ̀, ó fàáké kọ́rí

“Owóò mi ni tàbí báásí ẹran tí mo sọ”

Òrọ̀ yìí ṣẹ̀ wá ń kọjáa bá a ṣe pè é, ó ń dihun míìn                                70

Ṣáyé  Òyìnbó sì lèyí, kè é ṣe tàwọn baba wa

Kò pẹ́ náà là wa méjèèjì múra ó di kóòtù

A déwájú adájọ́ tó dì gágá dì gogo

Oníwá rojọ́ ẹlẹ́yìn rò, ẹlẹ́rìí ò kúkú sí

Ìwé a jọ tọwọ́ bọ̀ náà ló ṣẹlẹ́rìíi  wa                          75

Adájọ́ rọ̀rọ̀ síwá, ó rò ó sẹ́yìn

Ó bagbejọrò lẹ́jọ́, ó bagbẹjọ́rò léèrè ọ̀rọ̀

Ó ní kò sí ṣíṣe kò sáìṣe, báásí ẹran ni n ó san bá a ṣe sọ

Gbogbo aráyé ti wá owó wá, gbogbo aráyé  ti wá owó jọ, ̣n bàbá ò gbà

Ó ní àdéhùn tá a ṣe ti kọjá, ọjọ́ sì ti yẹ̀                               80

Mo woke, mo wolẹ̀, omí dà pẹ̀ẹ̀rẹ̀pẹ̀ lójúù mi

Ẹní gbọ́jọ́ ikú rẹ̀ á sìwà hù

Bó sìwà hù tán, á á sì ṣe pẹ̀lú

Níbi èrò dúró sí, ariwo sọ lọ kùù

Gbogbo wọn ń ṣèrántí ọjọ́ ìkúnlẹ̀ abiyamọ                                  85

A kì í kúkú bẹ̀bẹ̀ ní kóòtù, ohun adájọ́ sọ labẹ́ gé

Èyí náà ló máyáni lówó tó fi lọ yọdà, tó yọ̀bẹ  

Tó fẹ́ẹ́ gba báásí ẹran tá a jọ sọ

Kò sì mọ́bẹ rebi méjì bí ò ṣoókan àyà mi

Ǹjé bá a bu báásí ẹran kan láyà èyàn

Ikú ò níí dé?                              90

Mo kúkú gba kámú dé, mo fọ̀rọ̀ molúwa

Díẹ̀ ló kù, àní, ó kù bín-ńtín

Kí oókan àyà mi àtọ̀̀bẹ ṣ kòńgẹ́

Kí wọn dira mú kí wọn fara kora

Gbígbọ̀n tí mò ń gbọ̀n kọjáa torí omi                                95

Iye àìsàn tó ti kọ lù mí kọjá ogóje

Ẹní gbọ́jọ́ ikú rẹ̀ á sìwà hù

Láàárín ìdákẹ́jẹ́ẹ́ ladájọ́ figbe ta

Ó ní, “Dúró ayáni lówó

Báasí ẹran lẹ ṣèwé, ẹ kò ṣèwé ẹ̀jẹ̀  100

Ohun ìwé sọ lo ó gbà láìláfikún

Ohun ìwé sọ lo ó gbà láìlábùlà”

Kó o wà ńbẹ̀ níjọ́ ọ̀hún kó o wá wòran, ọ̀rẹ́ẹ wa

Kó wo bọ́wọ́ọ baba ṣe ń gbọ̀n tọ́bẹ ń jáábọ́

Àbí a ti ṣ é ya ni lọ́bẹ láyà kí pọ́n ó má ṣe                        105

N ò mọ bá a ti ṣeé ya ni lọ́ebẹ láyà kó má dọ̀rọ̀ ẹ̀jẹ̀

Ò̀rọ̀ dòdì ẹni à ń bẹ̀ ló wá tún ń bẹ ni

Ẹní a ń bẹ̀ ló wá ń ṣèpẹ̀

Torí òfin ti wà ńlẹ̀ látayérayé

Pé ẹni tó bá tàjẹ̀ sílẹ̀ á ṣòfùn ọ̀pọ̀     110

Tọrọ̀, tilé ẹni náà á á di tẹlẹ́jẹ̀

Bídájọ́ ṣe rí nígbẹ̀yìngbẹ́yín rèé, ọ̀rẹ́ẹ wa

Owó, owó, n ò san

Ọrọ̀ ayánilówó tún di tẹni

N lo ṣe bá mi níjọ́wo níhìn-ín tí mò ń mì nínú ọrọ̀                               115

N ò digun jalè, bẹ́ẹ̀ ni, n ò fọ́lé

Owó ayánilówó ni mo fi ń gbádùn araà mi

Èyí nìkan kọ́ ni wọ́n ṣe fáyáni lówó

Wọ́n tún lé e kúrò ní ìlú fún àbá ìpànìyàn

Ìgbà mo délé lọ̀rọ̀ yìí tóó wáá yé mi 120

N ò mọ̀ páya mo fẹ́ sílé ló dì gágá di gogo lórí àga ìdájọ́

Ń ṣe ló lọọ  gbaṣọọ adájọ́ kan tó fi ṣe tiẹ

Tó fi gbọkọ tó ní kalẹ̀ láìròtì

N náà lèmi ṣe máa fi ń ṣorin kọ

Pé tá ń péyàwó ò dáa                       125

Ta ń péyàwó ò sunwọ̀n

Kó wáá waya mo fẹ́ sílé

Tó fẹ́ni fúnre

N lèmi ṣe gbàwọn ọ̀dọ́ níyànjú

Pé wọn ó faya níní ṣe ti wọn          130

Aya nìyá ọkọ tó ò bá mọ̀