ÌBÒÒ MI

 

Èmi ò ní í fowó ọ̀wọ́n rọjà ọ̀wọ́n

N ò ní í fohun mo ní ṣohun ibi

Kọrọ má wáá lọ dàbámọ̀ nígbẹ̀yìn

Kó má dihun à á jeyín-ín sí

Ìbò kan, ìbò kàn                       5

Tó wà lọ́wọ́ọ̀ mi yìí

Ojú ológbò ni, ó ṣòroó kò lọ́jà

Torí náà ni n ó ṣe fi gbẹ́ni tó dáa wọlé

Kó wọlé wáá ṣehun rere fún mi

Ẹ̀kọ́ ń wù mí bẹ́ẹ̀ n ò lówó                  10

Mo ń wẹ́ni tí ó firúu wọn kọ́ wa

Iṣẹ́ ń wù mí kò sọ́nà

Ẹni tí ó gbọ́ ọ nì ń wá

N ríhun fibòò mi ṣe lóore

Kórí máa fọ́ni                          15

Ká relé aláwo náwó gọbọi

Ìyẹn ò wù mí

Ọ̀fẹ́ lỌlọ́run bùn a láfẹ́fẹ́

Ló bùn a lóòrùn

Ọ̀fẹ́ ló yẹ kíjọbaa wa                20

Máa tọ́júu gbogbo wa

Oúnjẹ sì tún ń kọ́ ẹ̀wẹ̀?

Ọ̀gàjà fọwọ́mẹ́kẹ́

Tó délée tálíkà tó fàpò rọ̀

Ẹni tí ó sọ oúnjẹ di gbẹ̀fẹ́ nì ń wá          25

Tí ó sọṣẹ́ àgbẹ̀ dihun iyì

Tí yóò sàn féku, tí yóò sàn fẹ́yẹ

Àwọn ni n ó fìbòò mi gbé wọlé

Èmi mẹ̀tọ́ọ̀ mi, n ò ní í ṣì í lò

Ìwọ ń kọ́, ìwọ àti ìwọ?