ẸGBẸ́ ÀWA

 

 Bó o ló ò wẹgbẹ́ẹ wa

Àwa náà ò toríì rẹ bọ̀gún

O ò wẹgbẹ́ẹ wa

Àwa náà ò toríì rẹ bọ̀gún

Ìṣ̣ẹ̀lẹ̀ kan ṣẹ̀ nísàlẹ̀ ìyín              5

Tó tóhun à á déléé wí

Ẹgbẹ́ẹ wa tá a ń sọ̀rọ̀ọ rẹ̀ yìí náà ni

Ẹgbẹ́ẹ ká ṣòfin láàárọ̀, ká tú u  lálẹ́

À bíwọ ò rófin má ta wóróbo lójúu títì

Nígboro Èkó tí wọ́n ṣe ńjọ́sí               10

Òórọ̀ ni wọ́n ṣe é, ọ̀sán la fìdí ẹ̀ gúnlẹ̀

Ó bùṣe, wọ́n ní á má mu ṣa-n-péè

O ò wálé àwa o wáá gbàkan o fi yọnu

Ti léèsì tí wọ́n sọ ńjọ́sí ló pa mí lẹ́rìn-ín

Èmi ọmọ ọlọ́mọ kí ni mo tíì ṣe                     15

Ṣe ni mo ṣẹ̀ṣẹ̀ ń fi léèsìí dá pátá

Wọ́n  ní á má ta púùlù, ẹ̀rín pa mí títí

Ṣé téyìí tá à á ṣe bá tán

Èyí tá  a kìí ṣe náà kó má jáàfara

To rọ́gbọ́n è é tán láyé ká wá a lọọ̀run                                              20       

N la ṣe ń gba tẹ́tẹ́ wa látilẹ̀ẹ Bẹ̀nẹ̀

Tá a ń ta nílẹ̀ẹ tàwa

Má fọ́lé kò kàn wá

Má fipá jalè kèé ṣofin-in tiwa

Àwa là ń sorí ọmọ dorí àá gbọ́ṣẹẹ́ lé              25

Igbó là wa fi ń sorín-ín rùn lóòórọ̀ ní kùtù

Ká kówó ilẹ̀ẹ wa relẹ̀ òkèèrè fàà ni.

Ọwọ́ kúdúrú la fi ń gbani síṣẹ́

Mẹ̀kúnù jẹun kò jẹ́un, wàhálàa rẹ̀

Ká wa sá  ti  gun pílẹ́sọ̀                  30

Bòrìṣà bá tilẹ̀ ń gbe gbogbo èèyàn

Ta ni yóò ké àgòyà fúnrú àwa

Àwa labínú kání

Wọ́n ní a ò lè bínú kálẹ̀

Ẹ fi wáàlẹ̀                              35

Ẹgbẹ́ yìí

Ẹgbẹ́ tó gbayì tó gbẹ̀yẹ ni

N náà ni mo ṣe máa ń sọ

Nígbà gbogbo pé

Bó o ló ò wẹgbẹ́ẹ wa                     40

Àwa náà ò toríì rẹ bọ̀gún

O ò wẹgbẹ́ẹ wa

Àwa náà ò toríì rẹ bọ̀gún