ÀGBẸ́KỌYÀ

Ọ̀rọ̀ ǹ bá rò n tó mẹ́fọ̀ọ́ rò

Ẹ̀fọ́ ǹ bá rò n tó fori sẹ́nu

Ọ̀rọ̀ yìí ṣẹ̀ níjọ́ọ̀jọ́sí tó dàbí àná

Ọ̀ṣọ́ọ̀sì laya Ògún témìí mọ̀

Ṣangó ló bá wa fỌya ṣaya                5

Ológun ló ń ṣọkọ gbogbo wa

Àwọn ló ń daríi wa nígbà ọ̀rọ̀ ṣẹ̀

Ohun tó dájàngbọ̀n sílẹ̀ kúrò ní bíńtín

Irú ẹ̀ ti ń dájàálẹ̀, òná ti jìn

Ó dájà púpọ̀ sílẹ̀, ọ̀ná na                            10

À bó o gbàgbé ogun àwọn obìnrin ìlú Abá ?

O gbàgbé ìjàngbọ̀n òde Ìṣẹ́yìn?

Ọkàn rẹ fo ti Abẹ́òkúta ni n dan?

Ohun tó dá gbogbo èyí sílẹ̀ náà là ń pè lówóorí

Ṣé àparò ni kìí fún ni láyà tíí gbàna lọ́wọ́ ẹni                            15

Tìjọba ò rí bẹ́ẹ̀

Wọ́n lẹ́ni fẹ́ẹ́ jẹyin awó á ṣawo

Ẹni fẹ́ẹ́ rin títì aláró gbọ́dọ̀ mú ṣílè sílẹ̀

Ẹni fẹ́ẹ́ mumi ẹ̀rọ gbọ́dọ̀ fowó ṣọwọ́

Ẹni ń fóṣùpá àtọwọ́dá láàrin ọ̀gànjọ́  20

Kó yáa fajé ránṣẹ́ sí wọn

Torí a ò lè jèkuru jàkàrà tán

Ká má fohùn eégún bọnu

Èyí sọ̀rọ̀ èèwọ̀

Ẹni fẹ́ẹ́ jẹun dan-indan-in kó yára múra dan-indan-in ni                              25

Èyí náà nìjọba fi sọ pẹ́ni tí yóò gbádùn àwọn nǹkan wọ̀nyí

Gbọ́dọ̀ sanwóo wọn bó ó ṣe tìpátìle

Torí dandan lowó orí

Ọ̀ràn-an-yàn laṣọ ìbora

Ṣùgbọ́n ojú táwọn àgbẹ̀ fi wọ̀rọ̀ yìí ṣèyàtọ̀                      30

À bóò mọ̀ pọ́rọ̀ àgbẹ́kọ̀yà ni mò ń sọ ni?

Àgbẹ́kọ̀yà tó ṣẹ̀ ńlẹ̀ yìí

Tó tàn ká bí iṣuu dàgí

Tó farun iwájú ará ilé mọ́ tará oko

A ti ń gbọ́rọ̀ nípa ìjà tẹ́lẹ̀ ri                           35

Ṣùgbọ́n ìjà èyí yàtọ̀

Kódà, ó yàjọrá

Ní tAbá, gbogbo wọn ni wọ́n ní wọ́n ṣe fẹ́ẹ́ pínwó orí fábo

Ní tAbẹ́òkúta ẹ̀wẹ̀

“N ó ṣe sanwó orí tólúwatrnwgbo wo

n   gbàdá e wà ni   bùn mi, orí tólúwa bùn-ùnyàn”                           40

Ṣùgbọ́n tàgbékọ̀yà yàtọ̀ díẹ̀ séyìí

Torí páwa là ń ṣèjọba araa wa

Yàtọ̀ sÉèbó tí ń ṣèjọba nígbà tàwọn tàkọ́kọ́

Èé wa ti wáá jẹ́?                      

Emi ló fa sábàbí?                      45

Gbàwọ̀sí-n-ò-gbàwọ̀sí ló dá wàhálà sílẹ̀

Ìjọba lówó kéré, ẹ dákun ẹ gbanwọ́ sí i

Àgbẹ̀ léyìí kàmọ̀mọ̀, ẹ dákun ẹ bù ńbẹ̀

Wàràwéré, ọ̀rọ̀ dìjà, ó dìpáǹle

Alápó ń gbápó, ọlọ́fà ń gbọ́fà            50

Ń ṣe lèèyàn tó níyàá jókòó sílé

Ẹni tó ní baba ló ń bá wọn-ọ́n lọ

Igbó yìí kọjá igbó ọ̀dájú, ọ̀rọ́ pọ̀

Àwọn téjìẹ mú lọ́, wọ́n ò níye

Àwọn tálùbúńtù pa ò lóǹkà               55

Ǹjẹ́́ ta là bá rí báwí, ẹ̀yin èèyàn-an wa?

Agbẹ́jọ́ apá kan dá ni wọ́n pè lágbà òṣìkà

Ọ̀rọ̀ ló wà ńlẹ̀ yìí, n gbọ́, kí lo rí sọ?

Ohun témìí rí ńbẹ̀ ò pọ̀, àwọn méjèèjì ló lẹ̀bi

Ǹjẹ́ ẹ̀yin àgbẹ̀ ọ̀rọ̀ kan yín                   60

Tíyín ni mo kọ́ fẹ́ẹ́ gbá mú

Torí ẹ fẹ́ẹ́ jori jata, ẹ̀ẹ́ lówóó san

Ẹ fẹ́ẹ́ dédìí ọ̀pẹ kẹ́ ẹ gbẹ́nu sókè

Ọ̀fẹ́ níí ro?                                

Títì ọlọ́dà tó dókoo yín, ọ̀run ló ti wá?                           65

Iná tí ń ṣẹ́jú wàìwàì lálẹ́, ẹ ṣe bóso ni?

Torí náà, ẹ̀ bá rọ̀rọ̀ wò

Pẹ́ni tí ó jẹ̀fà á ṣe wàhálà ìfà

Ẹní fẹ́ kó dára, á gbọnwọ́ sí i ni

Ǹjẹ́ ẹ̀yin ìjọba náà ó kù díẹ̀ káàtó      70

Orí bíbẹ́ kọ́ loògùn iná orí

Bọ́rọ̀ bá tún ṣe bí èyí dìjà lọ́jọ́ iwájú

Sùúrù sòkúta jiná tẹ́ ẹ̀ bá mọ̀

Àlàyé ló yẹ ẹ kó sóríi rédíò àti tẹ́lì

Pówó orí ò lọ sápò ẹnì kan

Àǹfààní ará ìlú ló wà fún tẹ́ ẹ̀ bá mọ̀