ÀKỌỌ́LẸ̀Ẹ YOÒBÁ

À bó ò gbọ́, àwé

Mo níre tó wà ńnú-unbi pọ̀

Ó kúrò ní wín- ńwín

Lóòótọ́ la mọ̀

Póyìnbó kó wa lẹ́rú, wọ́n kó wa singbà                         5

Ṣùgbọ́n tá a bá ń bá wọn wí náà

Ó yẹ á yìn wọ́n díẹ̀ o jàre

Fóhun ribiribi tí wọ́n ṣe fún wa

Àwọn ló fèdè kíkọ sílẹ̀ jí-nkíi wa

À bẹ́ ẹ̀ mọ̀ tẹ́lẹ̀?                         10

Tóri náà, ẹ má jẹ́ á pa gbogbo ẹyẹ

Tó ní hùruhùru lápá pọ̀ mádìyẹ

Adìyẹ kí i gbogbo wọn

Bóòrùn ti ń mú hanhan

Tó ń ní sánmọ̀ dúdú díẹ̀             15

Bẹ́ẹ̀ la réyìí tó ṣe wá lóore

Ńnú àwọn Èèbó

Èdè sì pọ̀ láyé rẹ rẹ rẹ

Tí è è tí ì di kíkọọ́lẹ̀

Ṣúgbọ́n a dúpẹ́, Yoòbá ti ń dàgbà nínú-un kíkọ               20

Ó ti ń digi àràbà nínú-un kíkà

Àwọn Èèbó ló sì ṣe ribiribi méje

Yàhàyà mẹfà

Láti rí i pé èyí kò forí sánpọ́n

Ó yẹ ká fọpẹ́ fúnjọ Sẹ́mẹẹ̀sì                          25

Tó ṣalábojútó ìkosílẹ̀ èdè yí

Ká dúpẹ́ lówọ́ọ Gómà

Ká fòòṣù bàǹbà fún Kíráódà

Ẹrú dúdú tó di Bíṣọ́ọ̀bù

Wọ́n ṣe é, a ò ní í gbàgbée wọn         30

Lóòótọ́, ó yéni, a sì mọ̀

Pé torí ẹ̀sìn àtọ̀húnrìnwá

Ni wọ́n ṣe sèdèe wa di kíkọ sílẹ̀

Torí ẹ̀ ni mo ṣe sọ ṣáájú

Pé ire pọ̀ ńnú-unbi                            35

Ẹran tí a ó tà

Bíbọ́ là á bọ́ ọ                           

Nnú ìkòkò dúdú

Lẹ̀kọ funfun ringindin tií jáde

Wọ́n da ọ̀pọ̀ ohun ilẹ̀ wa láàmú                  40

A ò jiyàn

Ṣùgbón láìsí wọn, èdèe wa ha lè di kíkọ sílẹ̀ bí?                               

Èyí lohun à ń wí

Bí yóò sì di kíkọ sílẹ̀

Ńnú-un ká ṣẹ̀ṣẹ̀ máa gbìyànjú           45

Kò tí ì lè gbégi osè rù

Kò fàràbà dání                         

Èyí sì jẹ́ nǹkan pàtàkì

Tá a rí lóore tí wọ́n ṣe

N la ṣe ń kí wọn                                50

Pé wọ́n ṣé èyí ná

Òmíìn la à mọ̀