KÒ SẸ́NI TÍ È É RẸ̀

 Mo ní kò sẹ́ni tí è é rẹ̀ láyé

Torí ó rẹ ilé-iṣẹ́ ńlá n lé e dilé epo

Ó rẹ ọjà kàràbàtà, ó di ráńdàbaòtì

Rírẹ̀ tó rAdésọlá tó dAperin

N ló rẹ  Mótàílátù tó dodo-Ọnà  5

Ó ragbégẹdú, ó godó

Ó rakóyẹ̀pẹ̀, ó godò tì

Ó rẹ ọ̀gágun, ó dọ̀gbẹ́ni

Ó rẹ ara ènìyàn pàápàá

Ó wó, ó kọjá sí ẹsẹ̀ Jéèsù lókè    10

Rírẹ̀ ló rẹ ọba té e wàjà

N ló rẹ kòfẹ́sọ̀ té e rọ̀  kalẹ̀ láìròtì

Rírẹ̀ tó rẹ ìjì ńlá té e datẹ́gùn

N ló rẹ ọ̀nà tó pẹ̀kun

Ó rẹ iná, ó feérú bojú                           15

Ó rẹ ọ̀gẹ̀dẹ̀, ó fọmọ rẹ̀ rọ́pò

Ó rẹ Fẹ́búárì, ó kọ̀, kò dé ọgbọ̀n

Mo ní kò sẹ́ni tí è é rẹ̀ láyé

Bó  rẹ omi, a gbẹ

Bó rẹ igi, a wó                                     20

Bó rẹ etí, a di

Bó rẹ ojú, a fọ́

Bó rẹ ẹsẹ̀, a rọ

Bó rẹ apá, a dá

Bó sì rẹ eyín pàápàá                             25

Kíká ní í ká

Kò sẹ́ni tí è é rẹ̀

Mo ṣe bí

Kó má baà dọwọ́ àárẹ̀

LỌlọ́run Ọba fi simi                  30

Lẹ́yìn tó ṣẹ̀dá ayé tán

Ìyẹn bí wọ́n ṣe sọ

Nnú ìwé àwọn kiriyó

Ntorí kò sẹ́ni tí è é rẹ̀