ÌBẸ̀M̀BẸ́ ÀTI DÙÙRÙ

Wọ́n ń tàpá lókùn-un, wọ́n ń tàkìtì lọ́sà

Ìbẹ̀mbẹ́ ń ró, ìlù ń dún kìì, ọlọ́mọlé ò dáwọ́ ró

Bàtá ń ṣe bátabàta, mo ń gbọ́ dùndún, mo ń gbọ́yáàlù

Níbii wọ́n ń ṣàjoyọ̀ nílée wọn

Olóòlù gbápóló orí méjì rù sẹ́yìn        5

Ẹ̀jẹ́ wẹrí, ẹ̀jẹ́ wẹrùn, ojú pọ́n koko, kò fọ́

Àwọn ọdẹ kò ṣàìkó tapó mọ́ tapò

Tó wọnú agbọ̀n tó dìpà ọdẹ

Wọ́n ń ṣèrántí araa wọn

Ẹni tó rí i pẹ́ran tà lọ́run, tó wẹ́ran lọ  10  

Ìsàlẹ̀ tí mo wò, ọ̀tọ̀ nihun mo rí

Àwọn ọmọ ìmàrò kan nàró

Àwọ́n kan jókòó sídìí dùùrù

Àwọn kan ń ta gìtá

Àwọn kan ń funpè                          15

Orin-in kiriyó ní ń bẹ lẹ́nu-un wọn

Ijó kọ́ làwọn tó nàró ń jó, iṣẹ́ ni wọ́n ń pè

Tí wọ́n ń peṣẹ́ bí ẹni ń rogun

Ìrònú di méjì n ò mèyí mà ṣe

Ìbẹ̀mbẹ́ ń kù bí òjò, dùùrú ń kọrin  20

O ò sì wáá là mí lọ́yẹ̀, ọ̀rẹ́ẹ wa

Èyí mà ga!