Yoruba for Academic Purpose: Àtamọ́

Kí ni Àtamọ́?

Nínú iṣẹ́ yìí, ọ̀rọ̀ nípa àtamọ́ ni a fẹ́ mẹ́nu bà. Klavan (1980: 65) sọ pé àtamọ́ ni àwọn fọ́nrán kan tí ó jẹ́ pé nínú ẹ̀ka fonọ́lọ́jì, wọ́n máa ń bá àwọn ọ̀rọ̀ kan ṣe pọ̀ ṣùgbọ́n wọn lè máà bá wọn ṣe pọ̀ nínú ẹ̀ka mọfọ́lọ́jì. Bí wọ́n bá sì bá àwọn ọ̀rọ̀ wọ̀nyí ṣe pọ̀ nínú ẹ̀ka mọfọ́lọ́jì, wọ́n lè máà bá wọn ṣe pọ̀ nínú ẹ̀ka fonọ́lọ́jì. Yàtọ̀ sí èyí, àwọn fọ́nrán yìí kìí ṣe àfòmọ́ ìṣẹ̀dá tàbí ti ìlò. Èyí fi hàn pé wọ́n ní àbùdá ọ̀rọ̀ wọ́n sì tún ni àbùdá àfòmọ́.

Arọ́pò-Orúkọ

Oyelaran (1987) àti Pulleyblank (1986) gbà pé oríṣi àtamọ́ kan ni arọ́pò-orúkọ[1]. Tí a bá wo gbólóhùn (1), bí àpẹẹrẹ,

(1a) Olú rí i

(1b) Olú rí mi, Ó pè mí

tí a bá fi ojú fonọ́lọ́jì wò ó, AR inú rẹ̀ ní nǹkan-an ṣe pèlú fáwẹ́lì ọ̀rò-ìṣe[2] tí ó tẹ̀ lé. Èyi fi hàn pé a kò lè fi gbogbo ara pè é ní ọ̀rọ̀. Tí a bá fi ojú mọfọ́lọ́jì wò ó, a ó rí i pé kì í ṣe àfòmọ́, yálà ti ìlò tàbí ti ìṣẹ̀dá[3] nítorí pé a kò lò ó láti ṣẹ̀dá ọ̀rọ̀ tuntun lára IṢ tí ó tẹ̀ lé.

Kì í ṣe pé torí pé AR yìí tẹ̀ lé IṢ ni ó jẹ́ kí ohun tí ó ṣẹ̀lẹ̀ sí i ṣẹ̀lẹ̀ o. Gẹ́gẹ́ bí Oyelaran (1987) ti ṣe àkíyèsí, nínú àwọn ẹ̀ka-èdè kan, IṢ ni o máa ń sọ irú fáwẹ́lì tí AR tí ó jẹ́ olùwà rẹ̀ máa ní. Ẹ wo gbólóhùn (2-5):

(2) Mo mí jó

(3) Mọ mí lọ

(4) Mo ṣé

(5) Mọ gbà

Nínú ẹ́ka-èdè yìí, a ó ṣe àkíyèsí pé ìbáṣepọ̀ wa láàrin fáwẹ́lì IṢ àti AR tí a bá fi ojú fonọ́lọ́jì wò ó. Nínú gbólóhùn (2-5), àjọṣepọ̀ àǹkóò fáwélì wà láàrin fáwẹ́lì AR àti IṢ[4]. Pẹ̀lú àlàyé wọ̀nyí, ó tọ̀nà láti pe AR ní àtamọ́.

Sílébù Olóhùn Òkè

Sílébù olóhùn òkè[5] ni wúnrẹn mìíràn tí a ó tùn yẹ̀ wò. Àbá méjì ni a ó yẹ̀ wò lórí SOO yìí. Bamgboṣe (1980) sọ pé SOO kò ní nǹkan kan-an ṣe pẹ̀lú àpólà ìṣe[6] nínú gbólóhùn. Ó ní òpin àpólà orúkọ[7] ni ó máa ń fi hàn. Iyẹn ni pé, ní (6-7), ohun tí SOO ń ṣe ni pé ó ya ibi tí APOR ti parí sọ́tọ̀ sí ibi tí APIṢ ti bẹ̀rẹ̀.

(6) Òjò ó rọ̀

(7) Àwọn túlẹ̀ ẹ́ gba ìsinmi

Tí a bá wo (6) àti (7) dáadáa, a ó rí i pé ohun tí alàyé Bamgboṣe (1980) ń fi yé wa ni pé, lóòótọ́, SOO kò ṣẹ̀dá ọ̀rọ̀ tuntun láti ara òjò tàbí àwọn túlẹ̀, síbẹ̀, APOR wọ̀nyí ni SOO ń bá ṣiṣẹ́ ó sì tún ní nǹkan-an ṣe pẹ̀lu fáwẹ́lì tí ó gbẹ̀yìn APOR yìí tí a bá fi ojú fonọ́lọ́jì wò ó. Lójú Awobuluyi (1975), atọ́ka afànámónìí ni SOO. Tí a bá fi ojú eléyìí wò ó, APIṢ tàbí gbólóhùn ni SOO ń bá ṣiṣẹ́ ṣùgbọ́n tí a bá fi ojú fonọ́lọ́jì wò ó, fáwẹ́lì tí ó gbẹ̀yìn APOR ni ó máa ń ràn mọ́.

Aṣáájú Ọ̀rọ̀-ìṣe Ọbọ̀rọ́

Nínú Bámgbóṣé (1990: 145), díẹ̀ nínú àwọn gbólóhùn tí ó sọ pé ó ní atọ́ka ọ̀rọ̀-ìṣe ọ̀bọ̀rọ́ nínú ni:

(8a) Ó fẹ́ẹ́ lọ

(b) Ó bẹ̀rẹ̀ sí í máa kọrin

(d) Omi náà tóó mu

Nínú àwọn àpẹẹrẹ (8a-d), àwọn atọ́ka ọ̀rọ̀-ìṣe ọ̀bọ̀rọ́ ni ẹ́, í àti ó tí a kọ yàtọ̀ yẹn. Bámgbóṣé (1990: 144) sọ pé í ni ìpìlẹ̀ atọ́ka ọ̀rọ̀-ìṣe ọ̀bọ̀rọ́. Àrànmọ́ ni ó sọ í yì di ẹ́ àti ó ní (8a àti d).

Atọ́ka Àpólà Orúkọ Oníbáàtan

Lójú Bamgbose (1990: 119), atọ́ka yìí ni ó máa ń wà láàrin OR tí ó bá ń yán OR. Ó pè é ní ẹ̀hun oníbàátan. Ó máa ń wáyé, ní pàtàkì, tí kọ́ńsónáǹtì bá bẹ̀rẹ̀ ẹ̀yán ajórúkọ, bí àpẹẹrẹ, ‘tiwa’ nínú

(9) Owóo tiwa

A ó ṣe àkíyèsí pé o tí ó dúdú jù lara ‘Owóo tiwa’ kò sí lára ‘owó’ tàbí ‘tiwa’ ní ìpìlẹ̀ bẹ́ẹ̀ rèé, ó ràn mọ́ ‘owó’ láìjẹ́ pé ó ṣẹ̀dá ọ̀rọ̀ tuntun lára rẹ̀. Gbogbo àkíyèsí yìí ni ó bá oríkì àtamọ́ tí Klavan (1980: 65) fi lélẹ̀ mu.

Alàyé Atàmọ́

Tí a bá fẹ́ ṣe àláyé àtamọ́, àwọn ohun márùn-ún ọ̀tọ̀tọ̀ ni a gbọ́dọ̀ ṣe àkíyèsí[8]. Lọ́nà kìíní, a gbọ́dọ̀ lè ṣe àlàyé orúkọ tí irú àtamọ́ bẹ́ẹ̀ ń jẹ́ (clitic identity). A ó máa pe èyí ní P1. Èkejì ni ẹ̀wọ́n tí ó gàba lé irú àtamọ́ bẹ́ẹ̀ lórí (domain of cliticization). A o má ape èyí ni P2. Ẹkẹ́ta ni àpólà tàbí ọ̀rọ̀ tí o gba irú àtamọ́ bẹ́ẹ̀ lálejò bóyá ìró ìbẹ̀rẹ̀ ọ̀rọ̀[9] bẹ́ẹ̀ ni o tàbí ìró tí ó wà ní ìparí (initial/final). A ó máa pe eléyìí ni P3. Ẹ̀kẹ́rin ni pé ọ̀rọ̀ tàbí àpólà tí ó gba àtamọ́ yìí ní àlejò, ṣé iwájú àtamọ́ yìí ni ó wà ni tàbí ẹ̀yìn rẹ̀ (before/after)? A ó pe eléyìí ni P4. Ẹkarùn-ún, tí ó jẹ́ ìparí, ni pé ṣé àtamọ́wájú ni àtamọ́ yìí ni tàbí àtamẹ́yìn (proclitic/enclitic). Eléyìí ni a pè ní P5.

Tí a bá fi ojú àlàyé tí a ṣe yìí wo AR, àláyé wa yóò lọ báyìí:

(10) Àtamọ́ Arọ́pò orúkọ

P1: AR

P2: AṢ[10].

P3: ìparí[11]/-

P4: iwájú àti ẹ̀yìn[12]

P5: àtamọ́wájú àti àtamẹ́yìn[13]

Ni (3), AR ni ‘mọ’(P1), oríṣi aṣàfihàn (P2) kan ni. Òpin (P3) ni àtamọ́ tí ó ṣẹ̀lẹ̀ ti ṣẹ̀ sí i nínú ‘mọ mí lọ’. Ẹ̀yìn (P4) ni fọ́nrán tí ó fa àtamọ́ wa ní (3) nítorí ìdí èyí, àtamọwájú (P5) ni. Tí a bá wá wo (1a) níbi tí a ti rí ‘Olú rí i’, àlàyé tí rí ṣe ni pé AR ni ‘i’ (P1) oríṣi aṣàfihàn (P2) kan ni. Ní (P3), ó ṣòro láti sọ bóyá ìbẹ̀rẹ̀ tàbí òpin ni àtamọ́ tí ó ṣẹlẹ̀ ti ṣẹlẹ̀ sí i nítorí ọ̀rọ̀ oníròó kan ni i ṣùgbọ́n tí a bá wo (1b), a ó rí i pé òpin ni àtamọ́ tí ó ṣẹlẹ̀ ti ṣẹlẹ̀ sí mi/mí nítorí pé ohùn orí IṢ onísílébù kan ni ó máa ń sọ irú ohùn tí AR tí ó jẹ́ àbọ̀ fún un máa ní. Òpin AR (1b) yìí sì ni àyípadà ohùn yìí ti ṣẹlẹ̀ tí a fi rí mi tí ó ní ohùn àárin àti mí tí ó ní ohùn òkè nítorí IṢ tí ó ṣaájú ọ̀kọ̀ọ̀kan wọn. Ni (P4), iwájú ni ohùn tí ó fa àrànmọ́ wa nìtorí ìdí èyí, ní (P5), àtamẹ́yìn ni àrànmọ́ tí ó ṣẹlẹ̀.

(11) Atamọ́ Oníbàátan

P1: atọ́ka oníbàátan

P2: AṢ

P3: -

P4: iwáju

P5: àtamẹ́yìn[14]

Ohun tí (11) ń ṣe àlàyé ni pé P1 sọ pé àtamọ́ oníbàátan ni àtamọ́ yìí. P2 sọ pé aṣàfihàn ni. Ní (P3), ó ṣòro láti sọ bóyá ìbẹ̀rẹ̀ tàbí òpin ni àrànmọ́ tí ó ṣẹlẹ̀ sí àtamọ́ yìí ti ṣẹlẹ̀ sí i nítorí ọ̀rọ̀ oníròó kan ni atọ́ka rẹ̀, ọ[15]. Ni (P4), iwájú ni ìró tí ó fa àrànmọ́ wa nìtorí ìdí èyí, ní (P5), àranmẹ́yìn ni àrànmọ́ tí ó ṣẹlẹ̀.

(12) Àtamọ́ SOO

P1: SOO

P2: WỌ

P3: -

P4: iwájú

P5: àr̀anmẹ́yìn

Ohun tí ó ń ṣẹlẹ̀ ní (12) fara jọ ohun tí ó ṣẹlẹ̀ ni (11). P1 sọ pé àtamọ́ SOO ni àtamọ́ yìí. P2 sọ pé aṣèrànwọ́ ìṣe[16] ni. Ní (P3), ó ṣòro láti sọ bóyá ìbẹ̀rẹ̀ tàbí òpin ni àrànmọ́ tí ó ṣẹlẹ̀ sí àtamọ́ yìí ti ṣẹlẹ̀ sí i nítorí ọ̀rọ̀ oníròó kan ni atọ́ka rẹ̀, bí àpẹẹrẹ ó tí ó dúdú jù nínú ‘Òjò ó rọ̀. Ni (P4), iwájú ni ìró tí ó fa àrànmọ́ wa nìtorí ìdí èyí, ní (P5), àranmẹ́yìn ni àrànmọ́ tí ó ṣẹlẹ̀.

(13) Atamọ́ àpólà ìṣe ọ̀bọ̀rọ́

P1: atọ́ka àpólà ìṣe ọ̀bọ́rọ́

P2: AF[17]

P3: -

P4: iwájú

P5: àtamẹ́yìn[18]

P1 sọ pé àtamọ́ àpólà ìṣe ọ̀bọ́rọ́ ni àtamọ́ yìí. P2 sọ pé oríṣìí àfòmọ́ kan ni. Ní (P3), ó ṣòro láti sọ bóyá ìbẹ̀rẹ̀ tàbí òpin ni àrànmọ́ tí ó ṣẹlẹ̀ sí àtamọ́ yìí ti ṣẹlẹ̀ sí i nítorí ọ̀rọ̀ oníròó kan ni atọ́ka rẹ̀. Ni (P4), iwájú ni ìró tí ó fa àrànmọ́ wa nìtorí ìdí èyí, ní (P5), àranmẹ́yìn ni àrànmọ́ tí ó ṣẹlẹ̀[19].

Àbùdá Ọ̀rọ̀ àti Àpínpẹ̀kun

Kí àlàyé wa lórí àtamọ́ lè kún tó bí ó tri yẹ, a nílò láti wo àbá tí Cann (1984) dá lórí abùdá ọ̀rọ̀ àti àpínpẹ̀kun[20]. Lójú Cann (1984), a lè pín ìsọ̀ri sí oríṣi mẹ́rin. Èkíní ni ìsọrí tí ó jẹ àpínpẹ̀kun tí ó sì tún jẹ́ àpólà. A ó má ape eléyìí ní APX[21]. Èkejì ni ìsọ̀rí tí kì í ṣe ọ̀rọ̀ tí kì í sì i ṣe àpólà; ìyẹn ni pé ó ju ọ̀rọ̀ lọ kò sì tó àpólà. Ìsọrí yìí kìí ṣe àpínpẹ̀kun, kìí ṣe ọ̀rọ̀ kì í sì i ṣe àpólà. A ó má a pe eléyìí ní XB. Ìkẹ́ta ni ìsọ̀rí tí kìí ṣe àpínpẹ̀kun tí ó sì jẹ́ ọ̀rọ̀. A ó pe èyí ní XD. Ìkẹ́rin ni ìsọ̀rí tí ó jẹ́ àpínpẹ̀kun tí ó sì tún jẹ́ ọ̀rọ̀. Eléyìí ni XC. Bí àwọn ìpín mẹ́rẹ̀ẹ̀rin ṣe rí nì yí:

(14) (i) {<APÍNPẸ̀KUN, +> <WÚNRẸN, ->} APX (ìsọ̀rí tí ó jẹ́ àpínpẹ̀kun ṣùgbọ́n tí kìí ṣe wúnrẹ̀n kan soso, b.a. ‘bàtà Olú’).

(ii) {<APÍNPẸ̀KUN, -> < WÚNRẸN, ->} XB (ìsọ̀rí tí kì i ṣe àpínpẹ̀kun tí kìí ṣe wúnrẹ̀n kan soso, b.a. ‘e Déle’ nínú ‘Ilée Délé’).

(iii) {<APÍNPẸ̀KUN, -> < WÚNRẸN, +>} XD (ìsọ̀rí tí kì i ṣe àpínpẹ̀kun tí ó sì jẹ́ wúnrẹ̀n kan soso, b.a. ‘Dele’ nínú ‘Ilée Délé’).

(iv) {<APÍNPẸ̀KUN, +> < WÚNRẸN, +>} XC (ìsọ̀rí tí ó jẹ́ àpínpẹ̀kun tí ó sì jẹ́ wúnrẹ̀n kan soso, b.a. ‘Olú’ nínú ‘Olú lọ’).

Yàtọ̀ sí òfin ìsọ̀rí, Cann (1984) tún dábàá òfin fún àwọn ọ̀rọ̀. Òfin yìí ni ó wà ní (15):

(15) (i) [+Ọ̀RỌ̀, +ÌPÌLẸ̀] (Èyí ni ọ̀rọ̀ tí a kò ṣẹ̀dá, bí àpẹẹrẹ, ‘lọ’) [+Ọ, +I][22]

(ii) [-Ọ̀RỌ̀, -ÌPÌLẸ̀] (Èyí ni àfòmọ́, bí àpẹẹrẹ, ‘i’ nínú ‘ijó’) [-Ọ, -I]

[+Ọ̀RỌ̀, -ÌPÌLẸ̀] (Èyí ni ọ̀rọ̀ tí a ṣẹ̀dá, bí àpẹẹrẹ, ‘ijó’) [+Ọ, -I]

[-Ọ̀RỌ̀, +ÌPÌLẸ̀] (Èyí ni àtamọ́, bí àpẹẹre, SOO) [-Ọ, +I]

Lẹ́yìn ìgbà tí a ti ṣe àlàyé oríkì ìsọrí àti òfin ọ̀rọ̀ tán, a lè wá wo bí wọn ṣe ń jẹ yọ lórí àkámọ́ aṣàmìsí.

(16) Olú fẹ́ẹ́ lọ (Olu wants to go)

[_IṢX[_{IṢD[+Ọ, +I]} fẹ́ =[23] [_IṢB[_{IṢD[-Ọ,
+I]}ẹ́ [_{IṢD[+Ọ, +I]} lọ]]]]]

Àwọn onígírámà kan gbà pé fẹ́ í lọ ni ìpìlẹ̀ àpólà yìí ṣùgbọ́n níwọ̀n ìgbà tí àrànmọ́ ti lè wáyé láàrin fáwẹ̀lì fẹ́ àti í láti fún wa ní fẹ́ẹ́ lọ, a kò jayò pa tí a bá sọ pé í yìí rọ̀gbọ̀kú lé fẹ́ lórí. Lójú àwọn onígírámà mìíràn, ìtumọ̀ kan náà ni Olú fẹ́ẹ́ lọ àti Olú fẹ́ ní àtilọ ní. Ohun tí a rí sọ sí èyí ni pé ìtùmọ̀ wọn ni ó bára mu, ìhun wọn yàtọ̀ sí ara wọn. Ọ̀rọ̀-atọ́kùn ni ní tí ó wà nínú ní àtilọ nígbà ti àtilọ jẹ́ ọ̀rọ̀ aṣẹ̀dá. Bí àkámọ́ aṣàmìsí fún fẹ́ láti lọ (fẹ́ ní àtilọ) yóò ṣe rí ni[24] (17). Àwọn àkámọ́ aṣàmìsí tẹ̀lé àwọn gbólóhùn yòókù.

(17) Olú fẹ́ ní àtilọ (Olú wants to go)

[_IṢX[_{IṢD[+Ọ, +I]}fẹ́][_ATX[_{ATD[+Ọ,
+I] ní}][_{ASC[+Ọ, -I]}àtilọ]]]

(18) Mo rí Olú (I saw Olú)

[_IṢX[_{IṢD[+Ọ, +I]}rí[_{AṢC[+Ọ,
+I]} Olú]]]

(19) Mo rí i (I saw him)

[_IṢX[_{IṢD[+Ọ, +I]}rí = [_{AṢC[-Ọ,
+I]} i]]]

(20) Aṣọọ Délé (Délé’s clothes)

[_AṢD[_{AṢD[+Ọ, +I]}Aṣọ = [_{ASB[AṢD[+Ọ,
+I]}ọ[_{AṢD[+O, +I]}]]]]

Àwọn onígírámà kan gbà pé Aṣọ Idélé ni ìpìlẹ̀ àpólà yìí yàtọ̀ sí Aṣọ i Délé tí àwọn tí ó gba i yìí gẹ́gẹ́ bí atọ́ka oníbàátan ṣe máa ń sọ. Lójú àwọn onígírámà tí o gba Aṣọ Idélé ní ìpìlẹ̀ Aṣọọ Délé, gbogbo OR Yorùbá ni fáwẹ̀lì bèrẹ̀ àti pé orúkọ tí a ń pè ni Délé nínú olórí ẹ̀ka-èdè Yorùbá, Idélé ni wọ́n máa ń pè é nínú àwọn èka-èdè Èkìtì kan. Bí èyí bá rí bẹ́ẹ̀, a jẹ́ pé àkámọ́ aṣàmìsí tí ó wà fún Aṣọọ Délé(Aṣọ Idélé) ni (21):

(21) Aṣọ Idélé (Délé’s clothes)

[_AṢX[_{AṢD[+Ọ, +I]}Aṣọ[_{AṢC[+Ọ, +I]}Idélé]]]]

Gẹ́gẹ́ bí a ti sọ ṣáájú, nínú gbólóhùn Òjòó rọ̀, lójú àwọn onígírámà kan, iṣẹ́ sílébù olóhùn òkè yìí ni láti jẹ́ atọ́ka fún oríṣìí ibá-ìṣẹ̀lẹ̀ kan. Àwọn kan sọ pé oríṣìí àsìkò kan ni ó jẹ́ atọ́ka fún nígbà tí àwọn kan sọ pé iṣẹ́ atọ́ka ìbámu ni ó ń ṣe. Iṣẹ́ yòówù tí ó ń ṣe, ó yìí rọ̀gbọ̀kú lé Òjò tí ó ṣaájú rẹ̀ púpọ̀. Bí wọn kò tilẹ̀ jọ sí nínú ìsọ̀rí kan náà, bí ìpìlẹ̀ SOO yìí bá jẹ́ í, gẹ́gẹ́ bí àwọn onígírámà kan ti sọ, láàrin í yìí àti ò tí ó gbẹ̀yìn òjò ni àrànmọ́ ti ṣẹlẹ̀. Nítorí ìdí èyí, àkámọ́ aṣ̀mìsí tí a ó lò fún Òjòó rọ̀ ni (22):

(22) Òjòó rọ̀ (It rained)

[_AFX[_{AṢD[+ọ, +I]}Òjò] = [_AFB[_{AFD[-Ọ,
+I]} ó]][_{IṢD[+Ọ +I]} rọ̀]]

Ìgúnlẹ̀

Nínú iṣẹ́ yìi láti fi ìyàtọ̀ tí ó wà láàrin àpólà, ọ̀rọ̀ tí ó jẹ́ ìpìlẹ̀, ọ̀rọ tí a ṣẹ̀dá, fọ́nrán tí ó ju ọ̀rọ̀ lọ ṣùgbọ́n tí kò tó àpólà, àfòmọ́ ìṣẹ́dá àti atamọ́ hàn kedere. Yàtọ̀ sí èyí, àtúpalẹ̀ tí a ṣe nínú iṣẹ́ yìí kò fi àyè gba pele bíi ti inú síńtáàsì onípele. Pele nínú síńtáàsì onípele máa ń dá wàhálà sílẹ̀ nígbà mìíràn nítorí àyọtúnyọ pele. Ohun tí a ní lọ́kàn ni pé, lẹ́yìn pele méjì (X^II) tí ó jẹ́ àpínpẹ̀kun, a lè rí àyọtúnyọ pele kan (X^I) kí ó tó wá kan pele òfo (X⁰). Kò sí àyọtúnyọ yìí nínú ìlànà aláìnípele tí a mú lò nínú iṣẹ́ yìí.

Àkójọpọ̀ Orúkọ Ìwé

Adewole (1986), ‘the Yoruba High Tone Revisited’, Work in Progress 19: 81-94. Edinburgh: Departmenent of Linguistics, University of Edinburgh.

Adewole, L.O. (1988), ‘the categorical Status and the Functions of the Yoruba Auxiliary Verbs with Some Structural Analyses in GPSG.’, PhD Dissertation, University of Edinburgh.

Adewole, L.O. (1998), ‘Another Visit to the Yoruba High Tone Syllable’, AAP 53: 91-106.

Awobuluyi, O. (1975), ‘On “the Subject Concord Prefix” in Yoruba’, Studies in African Linguistics 6, 1: 215-238.

Awobuluyi, O. (2013), Ẹ̀kọ́ Gírámá Èdè Yorùbá. Osogbo: Atman Limited.

Bamgbose, A. (1966), A Grammar of Yoruba. Ibadan: OUP.

Bamgbose, A. (1980), ‘Pronouns, Concord, Pronominalization’, Afrika und Ubersee LXIII: 189-198.

Bamgbose, A. (1990), Fonoloji ati Girama Yoruba. Ibadan: UPL

Cann, R. (1984), ‘Heads without Bars: A Theory of Phrase Structure’, An Unpublished Paper.

Cann, R. (1986), ‘The Structure of Words’, Work in Progress 19: 107-121. Eddinburgh: Department of Linguistics, University of Edinburgh.

Klavan, Judith L. (1980), ‘Approaches to a Universal Theory of Clitics.’, PhD Dissertation, University of London.

Owolabi, D.K.O. (1976), ‘Noun-Noun Construction in Yoruba: A Syntactic and semantic Analysis.’, PhD Dissertation, University of Ibadan, Ibadan, Nigeria.

Oyelaran, O.O. (1987) ‘Ọ̀nà Kan Ò Wọjà: Mọfọ́lọ́jì Yorùbá’, Yoruba 1: 25-44.

Oyelaran, O.O. (1992), ‘The Category AUX in the Yoruba Phrase Structure’, research in Yoruba Language and Literature 3: 59-86.

Pulleyblank, D. (1986), ‘Clitics in Yoruba’, Syntax and Semantics9: 43-64. New York: Academic Press.

[1] Wo Awobuluyi (2008:206) fún ìdí tí a fi lo arọ́pò-orúkọ dípò ọ̀rọ̀-arọ́pò-orúkọ. AR ni a ó máa lò fún arọ́pò-orúkọ láti ìsìnyí lọ.

[2] IṢ láti ìsìnyi lọ.

[3] Afòmọ́ ìṣẹ̀dá ni ‘i’ nínú ‘ijó’ nítorí pé a lò ó láti ṣẹ̀dá ọ̀rọ̀ tuntun láti ara ‘jó’ ni. Àfòmọ́ ìlò ni ‘s’ ara ‘books’ nítorí pé ‘book’ tí a ṣẹ̀dá rẹ̀ lára rẹ̀ fi ìlò yàtọ̀ sí i.

[4] Wo Adewole (1996 àti 2011) fún àlayé kíkún lórí àǹkóò fáwẹ́lì yìí.

[5] SOO láti ìsìnyí lọ.

[6] APIṢ láti ìsìnyí lọ.

[7] APOR láti ìsìnyí lọ.

[8] Wo Klavan (1980: 126) fún ẹ̀kúnṛẹ́rẹ́ àlàyé.

[9] tàbí àpólà

[10] Nínú gírámà ‘Minimalist’, oríṣìí aṣàfihàn (determiner) kan ni wọ́n ka AR si. Aṣàfihàn ni a gé kúrú sí AṢ.

[11] Tí a bá wo Mo lọ olóri ẹ̀ka-èdè Yorùbá tí ó di Mọ lọ nínú àwọn èka-èdè kan, a ó rí i pé òpin mo tí ó di mo ni àyípadà ti wáyé. Èyí ni a lo ìparí fùn. Ṣùgbọ́n tí a bá AR inú Mo rí I, ìró kan ni AR yìí. A kò lè sọ̀rọ̀ nípa iwájú tàbi ẹ̀yìn. Èyí ni a lo ‘-‘ fún. Àkíyèsí kejì yìí ni a ó lò fún àwọn àtamọ́ yòókù nítorí ìró kọ̀ọ̀kan ni wọ́n.

[12] Àrànmọ́wájú ni àrànmọ́ tí ó ṣẹlẹ̀ sí AR inú Mọ lọ. Àrànmẹ́yìn ni ó ṣẹlẹ̀ sí AR inú Mo rí i.

[13] Atamọ́wájú ni àtamọ́ tí ó ṣẹlẹ̀ sí AR inú Mọ lọ. Àtamẹ́yìn ni ó ṣẹlẹ̀ sí AR inú Mo rí i.

[14] Àtamọ́ oníbàátan ni ọ tí ó dúdú jù nínú ‘Aṣọ ọ Délé’

[15] Wo ìtọsẹ ọ̀rọ̀ (14).

[16] Aṣèrànwọ́ ìṣe ni a ń pè ní àfòmọ́ nínú gírámà ‘GB’ àti ‘Minimalist’. Àfòmọ́ yìí ni orí fún àpólà àfòmọ́.

[17] Nínú gírámà ‘GB’ àti ‘Minimalist’, oríṣìí àfòmọ́ kan ni atọ́ka ọ̀rọ̀-ìṣe ọ̀bọ̀rọ́ tí àwọn onígíràmà kan máa ń pè ní atọ́ka ìn-ìnfínítíìfù (infinitive).

[18] Atọ́ka àpólà ìṣe ọ̀bọ̀rọ́ ni ẹ́ àti ọ́ tí ó dúdú jù nínú gbólóhùn wọ̀nyí: ‘Ó fẹ́ẹ́ lọ’ àti ‘Ó mọ ọkọ̀ọ́ wà’.

[19] Àlàyé lórí àtamọ́ ju eléyìí tí a ṣ yìí lọ o ṣùgbọ́ ìwọ̀nba àlàyé tí yóò jẹ wá lógún nípa àtamọ́ nínú iṣẹ́ yìí nì yí. Fún ẹ̀kúnrẹ́rẹ́ nípa àtamọ́ inú èdè Yorùbá, wo Adewle (1998).

[20] Can 91984) pe eléyìí ní ‘lexical and maximal features’.

[21] ‘X’ dúró fún ìsọ̀rí ọ̀rọ̀, bí àpẹẹrẹ, OR, IṢ, àbbl.

[22] ‘I’ ni ó dúró fún ‘ìpìlẹ̀’, ‘Ọ’ sì dúró fún ‘ọ̀rọ̀’.

[23] Àmì yìí, ‘=’, duzró fún pé ọ̀rọ̀ tí ó ṣáájú, bí àpẹẹrẹ, ‘fẹ́’ nínú àpẹẹrẹ yìí, ni àtamọ́ yìí gbára lé. Irú iṣ́ yìí ni ‘=’ ń ṣe nínú àwọn àpẹẹrẹ yòó kù.

[24] Ẹ fi (i) Olú fẹ́ láti lọ/Olúfẹ́ẹ́ lọ wé (ii) Olú gbọ́dò lọ/Ópọn dandan kí Olú lọ. Bí ìhun gbólóhùn tí ó wà ní (i) ṣe yàtọ̀ sí ara wọn tí ìtumọ̀ wọn sì bára mu ni ìhun àwọn gbólóhùn tí ó wà ní (ii) náà ṣe yàtọ̀ sí ara wọn tí ìtumọ̀ wọn sì jọra. Èyí fi hàn wí pé ìhun gbóllohùn lè yàtọ̀ sí ara kí ìtumọ̀ wọn bára mu.

Yoruba for Academic Purpose

Monday, 4 May 2015

Àtamọ́

No comments:

Post a Comment