Yoruba for Academic Purpose: ÌGBÈ̩YÌN

Alàgbà Adékúnlé Adédire jé̩ o̩mo̩ bíbí ìlú Ilé-Ifè̩ ní ìpínlè̩ Ò̩sun. Ǹǹkan bí i àadó̩ta o̩dún ó lé díè̩ ni O̩ló̩run fi òǹkò̩wé yìí ta ìdílé Adékúnlé ló̩re̩. Ilé-è̩kó̩ L . A. primary school, Ilode ni ìlú Ilé-Ifè̩ ni alàgbà Adékúnlé ti bè̩rè̩ ìwé alákò̩ó̩bè̩rè̩, kí wó̩n tó ko̩já sí Saint Agnes Primary School, Ipo̩nri- Fárótadé ní ìlú Ilé-Ifè̩. Yéké̩mi High School àti Odùduwà College ní Ilé-Ifè̩ náà ni wó̩n ti lo̩ ilé è̩kó̩ girama.

Lé̩yin èyí ni wó̩n ta àtaré sí ilé è̩kó̩ gíga Adéye̩mi College of Education, ìlú Òǹdó láti gba oyè ìmò̩ ìjìnlè̩ àko̩gbà B. A (Ed.) ní o̩dún 1992. Ilé è̩kó̩ gíga fásitì Ìló̩rin ni wó̩n sì ti gba oyè ìmò̩ ìjìnlè̩ èkejì ní o̩dún 1997. Alàgbà Adékúnle ni akò̩wé E̩gbé̩ Aké̩kò̩ó̩ Ìjìnle̩ Yorùbá ní ilé-è̩kó̩ gíga Adéye̩mí ní o̩dún 1989/90, kí wó̩n tó di Ààre̩ e̩gbé̩ náà ní odun 1990/91. Àwo̩n náà sì tún ni alukoro e̩gbé̩ àwo̩n aké̩kò̩ó̩ agboyèkóyè ní ilé-è̩kó̩ gíga Ìlo̩rin ní o̩dún 1995/96.Ilé è̩kó̩ gíga fásitì O̩lábísí O̩nàbánjo̩ ti ìpínlè̩ Ògùn ni òǹkò̩wé àtàtà yìí ti ń s̩e is̩é̩ olùkó̩ni báyìí. Lára ìwe tí òǹkò̩wé yìí tún ti ko̩ ni Fòné̩tíìkì Èdè Yorùbá àti Mè̩kúnnù ń Ṣèlú.

ÌTÀN INÚ ÌWÉ ÌGBÈ̩YÌN NÍ S̩ÓKÍ

Ìwé Ìgbè̩yìn jé̩ ìwé eré onís̩e Yorùbá tí ó jé̩ ò̩kan lára àwo̩n òpó mé̩ta tí ó gbé lítírés̩ò̩ èdè yòówù tí ì bá à jé̩ dúró. Ìẃe eré onís̩e àpilè̩ko̩ náà dá lórí àwo̩n aké̩kò̩ó̩ ilé-è̩kó̩ girama ti Ifè̩ City College, èyí tó fìdí kalè̩ sí ìlú Ilé-Ifè̩. Àwo̩n akópa tí ò̩pò̩ ìs̩è̩lè̩ inú eré náà dá lé lórí jù ni Wálé, Òjó, Àjàyí, Bìmpé àti Ké̩mi. Bákan náà ni a rí Ògúntólú, bàbá O̩lá, ò̩gbé̩ni Kó̩lá, ìyá Bó̩lá, bàbá onímó̩ngòrò, àti bé̩è̩ bé̩è̩ lo̩.

Àwo̩n aké̩kò̩ó̩ inú ìwé yìí yan ìrégbè láàyò nígbà tí wó̩n wà ní ilé-è̩kó̩ àyàfi Ògúntólú tí ó jé̩ as̩áájú àti as̩ojú kíláàsì wo̩n tí òun jé̩ onílàákàyè àti àwo̩n díè̩. Ó kù de̩dè̩ kí wó̩n jáde ìwé mé̩wàá ni Ké̩mi lóyún fún ò̩gá ilées̩é̩ kan tí ó ń jé̩ bàbá O̩lá. S̩ùgbó̩n bàbá O̩lá kò̩ jálè̩, kò gba oyún náà. Báyìí ni Ké̩mi s̩e bí o̩mo̩ tí kò ní bàbá. Bóyá èyí ni ó mú kí Ké̩mi pinnu láti yí padà kúrò láàárín e̩gbé̩ oníranù, tí ó sì yan rere.

Lé̩yìn tí Ké̩mi ti jáde ilé-è̩kó̩ olùkó̩ni kìn-ín-ní, ó ń s̩e is̩é̩ olùkó̩ ní ilé è̩kó̩ kan ní ìlú Ilés̩a. Ó ní àfé̩só̩nà kan tí orúko̩ rè̩ ń jé̩ Bím̀bó̩. Àkókò ìgbéyàwó wo̩n kù dè̩dè̩ ni awo ya sí Bím̀bó̩ ló̩wó̩ pé Ké̩mi ti bímo̩ kan rí, èyí tí kò jé̩ kí òun mò̩. Bím̀bó̩ ko̩ Ké̩mi sílè̩. Nínú ìrònú yìí ni Ké̩mi sì wà nígbà tí ìjàǹbá ńlá s̩e̩lè̩ sí bàbá O̩lá tí i s̩e bàbá o̩mo̩ Ké̩mi. È̩san ìwà tí ó hù sí Ké̩mi ni ó so̩ ó̩ di aláìtíìló̩mo̩ láyé. Èyí ni ó sì mú kí ó padà wá be̩ Ké̩mi láti gba o̩mo̩ rè̩, Táyò̩.

Níwò̩n ìgbà tí Bímbò̩ ti fi àáké kó̩rí pé òun kò níí fé̩ Ké̩mi mó ni ìyá Bó̩lá tíí s̩e ò̩ré̩minú Ké̩mi gbà a ní ìmò̩ràn láti fi ara mó̩ Kó̩lá tí ó nífè̩é̩ rè̩ gidigidi. Olùkó̩ni ní ilé-è̩kó̩ gbogbonìs̩e póli (poly-technic) ni Kó̩lá.

Kò sí e̩ni tí kò ní ìgbè̩yìn nínú gbogbo àwo̩n aké̩kò̩ó̩ náà pátá; ìgbè̩yìn oníkálukú ló kàn yàtò̩ síra wo̩n. Àtubò̩tan ìwà àgbèrè àti ò̩pò̩ oyún tí Bímpé ti yo̩ dànù nígbà tí ó wà ní o̩mo̩ge ni ó lé e kúrò nílé o̩ko̩ lé̩yìn tí ó dúró fún o̩dún mé̩wàá gbáko láìrí o̩mo̩ gbé jó. Akin tí í s̩e o̩ko̩ rè̩ ìgbà náà lé e jáde. Èyí mú kí Bímpé padà lo̩ máa gbé ní ilé àlàpà tí àwo̩n òbí rè̩ kó̩ ní Omitótó, Ilode ní ìlú Ilé-Ifè̩. O̩jó̩ tí Bímpé lo̩ ra gbe̩re̩ tí yóò tún tà ló̩jà ni ó s̩e alábàápàdé Ògúntólú tí ó ti di ò̩gá àgbà ilé is̩é̩. Àtubò̩tán tàbí ìgbè̩yìn rere ni fún Tolú tí ó fi ojú sí è̩kó̩ rè̩. Tolú pinnu láti ran Bímpé ló̩wó̩.

Ké̩mi pinnu láti fé̩ Kó̩lá. Àwo̩n méjèèjì sì fi o̩jó̩ ìgbéyàwó wo̩n sí os̩ù kéjìlá o̩dún náà. Àkókò tí Ké̩mi mú ìwé ìpè síbi aye̩ye̩ ì́gbeyàwó rè̩ lo̩ sí ò̩dò̩ Tolú ni ó gbó̩ pé o̩wó̩ s̩ìnkún àwo̩n agbófinró ti te̩ Wálé, Àjàyí àti àwo̩n méjì mìíràn, èyí tí wo̩n yóò fi è̩yìn wo̩n ti àgbá ní o̩jó̩ náà gan-an. Ìgbè̩yìn ti àwo̩n nìyí. S̩ugbó̩n Òjó ní tirè̩ tètè pinnu láti yan dáadáa. Òun tilè̩ máa ń kàwé ní òròòru ní àsìkò tí wó̩n wà ní sé̩kó̩ńdírì s̩ùgbó̩n àwo̩n ò̩ré̩ rè̩ kò mo̩ èyí. Èyí mú kí ó lè tè̩ síwájú nínú è̩kó̩ rè̩. Yunifásitì Ìbàdàn gan-an ni ó ti ké̩kò̩ó̩ gboyè ó sì ń s̩is̩é̩ olùkó̩ ní Ìbàdàn Grammar School.

Gé̩gé̩ bí òwe tí òǹkò̩wé pa, òs̩é níí s̩áájú e̩kún, àbámò̩ ní í gbè̩yìn ò̩̩̀rò̩, gbogbo ò̩tò̩tò̩ ìlú pé jo̩, wo̩n kò rí e̩bo̩ àbámò̩ s̩e. Níbi tí e̩lé̩kún ti ń sunkún ni aláyò̩ ti ń yò̩ ni ò̩rò̩ ò̩hún. Àmó̩ ní ti Ké̩mi tí a gbà gé̩gé̩ bí olú-è̩dá ìtàn inú ìwé yìí, àbámò̩ kò s̩e bé̩è̩ gbè̩yìn ò̩rò̩ rè̩ tán pátápátá. Bé̩è̩ náà sì ni ti Òjó

ÀWO̩N O̩NÀ ÈDÈ YORÙBÁ TÍ Ó JE̩ YO̩ NÍNÚ ÌWÉ ÌGBÈ̩YÌN

O̩kan-ò-jò̩kan àkànlò èdè ayàwòrán ni ó ń tawó̩-tasè̩ nínú ìwé àpilè̩ko̩ Igbeyin. Òǹkò̩tàn sì s̩e àmúlò àwo̩n o̩nà èdè náà dáadáa. Ò̩gangan ibi tí òwe bá ye̩ kí ó ti wáyé ni a ti ń rí i. Òǹkò̩wé yìí kò gbé o̩mo̩ O̩bà fún Ò̩s̩un rárá. Èyí kò lè s̩àìmáà rì í bé̩è̩. Ohun tí ó s̩e okùnfà èyí kò fara sin rárá. Ògúnná gbòǹgbò tí ń dátó̩ lé̩nu ìgbín ni alàgbà Adékúnlé Adédire; ìmò̩ è̩dá-èdè tó yanranntí ni ó papò̩ mó̩ ìmò̩ lítírés̩ò̩. Èyí ni ó sì mú ìwé náà dùn mó̩ ni láti kà ní àkàgbádùn. Díè̩ lára àwo̩n o̩nà èdè Yorùbá tí ó hànde nínú ìwé náà ni òwe, àkànlò èdè, àdàpè/àfidípò, àfiwé tààrà, fìrósínròóje̩, ìbéèrè pèsìje̩, ìfò̩rò̩dárà, ìyánrò̩ fé̩é̩ré̩, àwítúnwí àti bé̩è̩ bé̩è̩ lo̩.

ÒWE

Láìsí tàbí-s̩ùgbó̩n, òwe ni ó pò̩ju nínú àwo̩n o̩nà èdè Yorùbá tí ó je̩ jáde nínú ìwé náà. Ìwò̩nyí ni díè̩ lára àwo̩n òwe Yorùbá tí ó je̩ yo̩:

i. Òs̩é ní í s̩áájú e̩kún, àbámò̩ ní í gbè̩yìn ò̩rò̩. Gbogbo ò̩tò̩tò̩ ìlú pé jo̩, wo̩n kò rí e̩bo̩ àbámò s̩e.

ii. Ìwà o̩mo̩ níí mú o̩mo̩ je̩ òkígbé̩.

iii. Ìdá ni ìkó.

iv. Idà ń wólé ara rè, ó ní òun ń ba àkò̩ jé̩.

v. Àtijó̩ tí alákàn ti ń s̩epo, epo rè̩ kò kún ahá.

vi. Àìfinipeni, àìfèèyàn pèèyàn tíí mú ará oko sán ibàǹté̩ wò̩lú.

vii. O̩jó̩ ní í pé̩, ìpàdé kìí jìnnà.

viii. Ikún ń jò̩gè̩dè̩, ikún ń rèdí mó̩lè̩, ikún ò mò̩ póhun tó dùn ní ń s̩ekú pani.

ix. Apèèpo lé̩yìn àgbà, àgbà yóò kan è̩yin náà bó pé̩ bó yá.

x. Ojú tí kò rí pípó̩n iná, tí kò rí rè̩rè̩ òòrùn, kò lè rí ohun tó jo̩ bí ide̩.

ÀKÀNLÒ ÈDÈ

i. Ó dìgbà tí a bá fi e̩nìkan jófin…

ii. E̩ jé̩ kí a má fi òjò tiwo̩n gbinkà…

iii. E̩ran àgbà ni o.

iv. Ìye̩n ìtì ò̩gè̩dè̩.

v. Ó ti fé̩rè̩ jáwé dímú.

vi. Wó̩n wí wí wí, mo ko̩tí ikún.

vii. Ko ye ki a tun maa fi eko tanna funra wa.

viii. À ní mo ti fé̩ra kù.

ix. O̩wó̩ pálábá àwo̩n aké̩kò̩ó̩ bé̩è̩ yóò ségi.

ÀFIWÉ TÀÀRÀ

i. Ké̩mi, o ò rójú bàbá ye̩n bó s̩e wú gúdugùdu bíi kúlíkúlí Àjàs̩é̩-Ìpo.

ii. Wó̩n ń fi ó̩ ré̩rìn-ín fún àbùkù tó wà lára rè̩ bí owó páńda ni.

iii. Tí ojú re̩ ń wami bí e̩kún eléji.

iv. Tó wú tútú bí olóòwu òtùtú.

v. Gúdugùdu lojú rè̩ rí bí ojú e̩ni forí gbé ilé agbó̩n.

vi. S̩e kò sí ǹǹkan tí o fi ń dá kùn bí òkú àgàn?

vii. … tí è̩ ń bó eyín bí e̩ni je̩ púùlù.

ÌFÒ̩RÒ̩DÁRÀ

i. O̩mo̩nígèlègélé rè̩ ti s̩eré géle lónìí.

ii. Bàbá O̩lá ò wá, bàbá o̩là ló wá, kò sì mó̩là ló̩wó̩.

iii. Ibi tí Ifá ti tà, wo̩n ò gbó̩fá, bé̩è̩ ni ìfà sì tún ń be̩ l’Ó̩fà níbi tí àwo̩n ènìyàn ti ń dífá tó ń fa ìfà á wá.

ÀFIDÍPÒ/ÀDÀPÈ

i. S̩è bí o mò̩ pé e̩ran àgbà ni

ii. Bàbá ti gbé̩mìí mì.

iii. … títí tí mò̩mó̩ fi jé̩pè Olúwa.

iv. Ké̩mi, bàbá Wálé ti jáwé dímú.

ÀWO̩N È̩KÓ̩ TÍ A RÍ KÓ̩ NÍNÚ ÌWÉ ÌGBÈ̩YÌN

Àwo̩n àgbà bò̩, wó̩n ní bómi bá balè̩, a nípa, òjò balè̩ ta s̩àràs̩àrà. Ìdí òwe yìí ni pé kò sí òǹkò̩wé onís̩é̩ o̩nà alátinúdá tàbí òǹkò̩tàn tí kìí ní is̩é̩ kan tàbí òmíràn tí ó ń fi is̩é̩ rè̩ rán sí àwùjo̩. Bákan náà ni ti ìwé Igbeyin s̩e rí. Àwo̩n è̩kó̩ pò̩ lo̩ bí ilè̩ bí e̩ní fún tó̩mó̩dé-tàgbà láti s̩àmúlò nínú ìwé eré onís̩e abójú-ayé-mu yìí. Òtító̩ ni pé eré tó dá lórí àwo̩n ò̩dó̩ ni, àmó̩ kò sí e̩ni tí kò níí rí omi o̩gbó̩n bù mu nínú rè̩. Díè̩ nínú àwón è̩kó̩ tí ìwé yìí ń kó̩ wa nìyí:

Ní àkó̩kó̩, bí a bá ti ibi ìs̩áná kíyèsí òògùn, a ó rí i dájú pé eré yìí ń so̩ fún àwa aké̩kò̩ó̩ pé kò sí ohun tí a s̩e lónìí tí kò ní èrè lé̩yìnwá ò̩la. Àti pàápàá pé às̩egbé kan kò sí láyé, às̩epamó̩ ló wà.

A tún rí i kó̩ pé è̩san rere ń be̩ fún o̩mo̩ tí ó ko̩jú mó̩ è̩kó̩ rè̩, àti pé irú o̩mo̩ bé̩è̩ kò níí s̩e e̩rú e̩gbé̩ rè̩ ló̩jó̩ ò̩la. Bé̩è̩ náà ló sì jé̩ pé ìdàkejì ni fún irúfé̩ aké̩kò̩ó̩ tó bá ń sá kiri. Gbogbo àwo̩n aké̩kò̩ó̩ tí ó ń sá kiri ni ìgbè̩yin wo̩n polúkúrúmus̩u, àyàfi Òjó tí ó tètè s̩e àtúns̩e sí ò̩nà rè̩.

È̩wè̩, a rí i kó̩ pé kí a má fi gbogbo ara máa tè̩lé àwo̩n e̩lé̩gbé̩ wa nípa ohun kan tàbí òmíràn tí wó̩n bá ń s̩e. Èyí ni ohun tí ó s̩e̩lè̩ láàárín Òjó àti àwo̩n e̩lé̩gbé̩ rè̩. S̩e àwo̩n ò kúkú mò̩ pé Òjo̩ a máa kàwé ní ò̩gànjó̩ òru nínú ilé rè̩, bé̩è̩ ni wó̩n sì ń s̩e àfarawé e rè̩, títí tí òun fí s̩e às̩eyege nínú ìdánwò às̩ekágbá.

Bé̩è̩ náà ni ìwé yìí tún bá àwo̩n òbí wí pé o̩mo̩ ti̩ a ò bá kó̩ ni yóò gbé ilé tí a kó̩ tà. Èyí ni ti Wálé àti àwo̩n òbí i rè̩. Àwo̩n òbí i rè̩ ni wó̩n bà á jé̩ débi pé wó̩n gbà á láyè láti máa lo̩ sí òde àlo̩sùn.

A kò s̩àìrí i dájú pé àtubò̩tán ìs̩ekús̩e àti oyún s̩ís̩é̩ kò dára. Bí i kó ránni ló̩run àìpé o̩jó̩, ó le ba ilé o̩mo̩ je̩ débi pé onítò̩hún le máà rí oyún ní débi tí yóò ní o̩mo̩ láyé. Èyí ni ó mú kí o̩ko̩ Bímpé kò̩ ó̩ sílè̩ lé̩yìn o̩dún mé̩wàá tí wó̩n ti jo̩ ń gbé.

Ní àkótán, mo wòye pé òwe àwo̩n Yorùbá tó so̩ pé ‘ Ìgbè̩yìn ní í yé olókùú àdá’, àti pé ‘ Ìgbè̩yìn laláyò ń ta’ ni òǹkò̩wé yìí s̩e àgékúrú fún. Bí a bá sì yiri è̩ wò dáadáa, a ó rí i gbangba pé àwo̩n òwe náà bá àwo̩n ìs̩è̩lè̩ inú eré náà mu dáadáa.

Reference

M.A. Adekunle (1997), Ìgbẹ̀yìn. Ifẹ: Amat Publishers.

Yoruba for Academic Purpose

Friday, 27 April 2018

ÌGBÈ̩YÌN

No comments:

Post a Comment