Ẹ JÍ GÌRÌ

Mo ní ẹ̀yin ọ̀mọ̀wé ilẹ̀ yí

Ẹ dide, ẹ jí gìrì

Ẹ ta ṣàṣà gbédèe wa ga

Ọ̀pọ̀ọ kùsà la à tíì wà

Tí kò jẹ́ ká mọ àṣàa Yoòbá dunra     5

Ọ̀pọ̀ ọ̀rọ̀ọ wa ni kò sí

Nínú-un gbédègbẹyọ̀ kankan nílẹ̀ yìí

Bí a bá sọ ọ sí wa

Yóò pa wá lákọsẹ̀

Nítorí Ìbàdàn nìkan la mọ̀                           10

A ò mọ láyípo

Ìṣín nìkan la mọ̀ ọ́n jẹ

A kò mọkú ojú rẹ̀ẹ́ yọ

Ègùn nìkan la gbọ́

A kò gbọ́ wọ́yọ̀wọ́yọ̀               15

Mo kí ọ kí ọ nìkan la mọ̀

A ò mèrò ò wájà

Nítorí a kò kọra sédèe wa

Òfeerefé la mọ̀, a ò mọ̀jìnlẹ̀ ọ̀rọ̀

Ẹni lédèe wa ò jọjú                  20

Asẹ́ ló fi ń gbèjò un

Ara rẹ̀ ló ń tàn-án jẹ

Ọwọ́ ara ẹni lèmí mọ̀

Tá a fi ń túnwà ara ẹni ṣe

Bá a bá dúró dỌlọ́run fẹ́ẹ̀ẹ́ ṣe é       25

Yóò pẹ́ wa tọ́pẹ

Ẹní dákẹ́ tiẹ̀ á ba dákẹ́

Torí náà

Ẹ jẹ́ á dìde lónìí

Ká gbédèe wa ga                   30

Àgbájọ ọwọ, n là á fií sọ̀yà

Ẹní pe ti ẹ̀ lákísà ẹlẹ́gbin

Laráyé ń bá a pè é bẹ́ẹ̀

Aṣọ àlà ni tiwa

Ẹ má jẹ́ wọn ó tapo sí i            35

Torí náà, ẹ dìde

Ẹ dìde ká jọ fọwọ́ tì í

Ká gbédèe wa débi ògo

Ẹ má jé kó dàbí ejò tó wọnú àgé

Agbá dọwọ́ọ wa.                      40