ÌPADÀBỌ̀ AÁFÍRIKÀ

Gbogbo àwa èèyàn dúdú

Gbogbo wa ló ń sunkún kíkorò

Ẹkún àsun-ùn dabọ̀

Fún ọ, ìwọ Aáfíríkà

Tí wọ́n gbà lọ́wọ́ awọn babaa babaa wa                                           5

Nígbà tójú ò ì tíì là tó yìí

Mo ní o padà bọ̀

Dákun padà bọ̀, ilẹ̀ Aáfíríkà

Táwọn Èèbó gba lọ́wọ́ọ wa

Nígbà tójú sì dúdú                            10

Mo ní o padà bọ̀

Dákun padà bọ̀ ilẹ̀ Aáfírikà

Táwọn Potogí sọ dẹrú

Nígbà ojú sì dúdú

Mo ní o padà bọ̀                     15

Dákun padà bọ̀, ilẹ̀ Aáfíríkà

Tá a tà látọwọ́ àwọn ọ̀dàlẹ̀

Nígbà ojú sì dúdú

Mo ní o padà bọ̀

Dákun padà bọ̀, ilẹ̀ Aáfíríkà            20

Kí gbogbo ìyàa wa kọjá

Kí gbogbo wa dòmìnira

Mo ní o padà bọ̀

Dákun padà bọ̀ ilè aáfíríkà

Òmìnira yìí ò tíì kárí                       25

Wòyà tó sì ń jẹ wọ́n níhà ibì kan

Mo ní o pada bọ̀

Dákun padà bọ̀, ilẹ̀ Aáfíríkà

Òmìnira òṣèlú yìí ò tí ì tó

A tún ń fẹ́ tọrọ̀ ajé pẹ̀lú       30

Mo ní o padà bọ̀

Dákun padà bọ, ilẹ̀ Aáfíríkà

Tó o bá fi tọrọ̀ ajé kún un tán

Kó o wáá fi tèdè kún un pẹ̀lú

Mo ní o padà bọ̀                    35

Dákun padà bọ̀, ilẹ̀ Aáfíríkà

Tó o bá ṣe gbogbo èyí tán

Kó o wáá fìṣọ̀kan sáàárín-in wa.