Yoruba for Academic Purpose: MỌ́KÙÚ

Ǹjẹ́ tó o ba fẹ́ lóbìnrin ọ̀rẹ́ẹ wa,

Ọ̀rọ̀ gbàdúà

Tori ọ̀rọ̀ kan ṣẹ̀ nígbà ìṣẹ̀ǹbáyé

To jóhun to kọni lóminu to gbọgbọn jọjọ,

Ọkunrin ọ̀gágun kan lo fáya ti ò bọ̀pẹ̀lẹ̀ wò 5

T’ayá ijọ́wo níhìn-ín wáá dẹni tó ń kó bani

Kédùmare jọ̀wọ́ fún wa lóbinrin ẹni, aya àtàtà,

Ká má ṣe gbákóbáni sílé ka lá a fáya

Ọ̀gá yii ń toju ogun bọ̀ tòun tọ̀rẹ́ ẹ̀

Pẹ̀kí mo ko’re ni wọ́n ko awọn àgbà mẹ́ta 10

Ṣọ́rọ̀ àwọn àgbà si maa ń ṣẹ tẹ́lẹ̀ níṣẹ̀ǹbáyé.

Ríríi wọ́n ri wọ́n làwọ̀n èníyán móhùn sẹnu

Wọ́n ni, “Mọ́kùú, àbí wọ́n ti ń pè ọ́ ri?”

Ẹni à ń sọ̀rọ̀ rẹ̀ yìí ni wọ́n ń fọ̀ sí t’ó ò bá mọ̀

Wọ́n ní “Kaabiyesi, olori ogun lo jẹ́, o máa dọba” 15

Ọ̀rọ̀ yìí gbèrò, o fa háà dani

Nitori ọba ti ń bẹ lóyè ò kú, bẹ́ẹ̀ ni, kò ṣàìsàn

“Bi n ó ṣe jọba yìí yóó ṣojú gbogbo wá”

Bayii ni Mọ́kùú sọ to dára le nì tìrẹ̀

Ṣùgbọ́n wọ́n ni, ‘Ibi ti a ti ń wo alaáìsán la ń wora ẹni 20

Ẹni dákẹ́ ti ẹ̀ náà a bá a dakẹ́,” kìí ṣèèwọ̀

Nnáà lọ̀rẹ́ Mọ́kùú, eyi ti ń jẹ́ Jọjọ

Lo ni k’awọn àgbà yẹ oun lọ́wọ́ kan ìbò wò

Ni ọ̀rọ̀ di fàà ńlẹ́

N ló mórin bọnu to ń ké tantan 25

Pé “Ire ti n ó ní ń kọ́ ni mo wí,

Oju àgbà mò ń wò.

Ireè mi gbogbo lọ́wọ́ àgbà

Aṣọ tí n o ni ń kọ́ ni mo wi,

Oju àgbà mò ń wò 30

Ire mi gbogbo lọ́wọ́ àgbà,

Ire gbogbo tí n ó ni ń kọ́ ni mo wi,

Oju àgbà mò ń wò.

Ire mi gbogbo lọ́wọ́ àgbà.

Ẹyin eníyán, ẹ̀yin ènìyàn 35

Kẹ tètè wa ba mi dámọ̀ràn

Bíwá o ti rí fun mi o.”

Awọn àgbà náà ò kúkú fìkan pe méjì

Wọ́n ni “Bi Dàda ò lè jà

Aburo ti ń bẹ lẹ́yin rẹ̀ gbóju jọjọ 40

Wọ́n ní ‘o ò níí jọba

Ṣùgbọ́n tìrandíran-an rẹ lọbaá ṣe.”

Bayii lawọn àgbà sọ mọ

Tí wọ́n pòórá, ti wọ́n dàwá tì

Nnáà làwọn ọ̀rẹ́ meji ba file ṣe lílọ́ 45

Wọ́n dele, ọba ń file potí, o ń fonà rokà

Nítori ogun won lo, ogun gidi ni í ṣe

Ìjàa won jà lo ṣèjà àtàtà

Loba ba fi pèrò pọ̀ to kúkú selérí

Poun á bẹ Mọ́kùú wò délédélé 50

Gẹ́gẹ́ bi ọ̀gágun pàtàkì, akọ ninu ogun.

Mọ́kùú délé, o fìròyìn tétí aya rẹ̀ lọ́ọ̀dẹ̀

K’Oluwa ma f’ayaabú fun wa fẹ́, ẹ ṣàmín ẹ̀

Aya ni, “Kò si ṣíṣe kò ṣáìṣe pípa lo yọba”

“Kó fipòólè f’ólòó ẹlẹ́jẹ̀ tútù 55

Kọ́ba wàjà ká fẹ́lòmíìn jọba.”

Ṣó kúkú ti mọ̀ pọ́rọ̀ ọba míìn ò le kọja Mọ́kùú

À bẹ́ ẹ̀ rímọ̀ràn ìyàwó oníràdà

Aya burúkú tí í mú’ni ṣebi

Mọ́kùú gbọ́, o gba tìyàwó ẹ̀ àfẹ́-sílé 60

O pèrò pọ̀, o fi tikú ṣe tọba

Ìránṣẹ́ ọba t’o kọ háà láfẹ̀mọ́jú

Lo ni kẹ́nu ẹ̀ ya dépàkọ́ láìṣẹ̀ tì

Kò pẹ́ náà, kò jìnà tí wọ́n fi Mọ́kùú joyè

Wọ́n gbadé lé e lórí ń ló fi dọba 65

Ó joye tan ìrònú ò tán, ìrònú ò kúrò

Ó rántí óhun ayé wi, o ranti ohun éníyán sọ

Pe Jọjọ ò ní í joyè ṣùgbọ̀n ọmọ ẹ̀ ni yóó jàrólé,

Àṣé tọ́jọ́ bá ro tán, adìyẹ a máa jẹ̀fun ara wọn,

Ọdẹ a máa pọdẹ, kò léèwọ̀ 70.

Ògún a máa pọkọ sẹ́yìnkùnlé

A pàlè sídìí ààrò

A paya sìta gbangba

Bayii náà ni Mọ́kùú ránṣẹ́ sawọn panipani

Pe wọn ó gbóríi Jọjọ wá tọmọtọmọ 75

Ki wọ́n o pa erú ikú tòun tèso inu rẹ̀

Ṣàwon wọ̀nyi ò moju to fọ́ yàtọ̀ séyìí tó ń ṣedin

Awọn lolórí ńlá, awọn lalátàrí gèlèmọ̀

Wọ́n múrìn àjò pọ̀n, wọ́n lọ̀ dọdẹ Jọjọ

Wọ́n dọdọ Jọjọ bi ẹni dọdẹ eku 80

Wọn sẹni ẹlẹ́ni dohun a ń fihun pa

Ṣugbọn ọba ń bẹ loke ti ò nii jẹ́ wọn ó pa Jọjọ lápàarun

Jọjọ la rí mú, ọmọ feré gé e

Ọ̀rọ̀ yii ṣẹ̀ẹ̀ wa ń dọ̀ràn, o ń di kàyéfi

Ọba tun gbádé orí, ó lọ fi pàdé wọn 85

Awọn ìyá mi ìyá òsòròngà, awọn ayé,

Àwọn tí ń tinú jẹran ti ń tẹ̀dọ̀ jọkàn

Wọn a tìdí jòróòro

“Ǹjẹ́ bá wo la o ti ṣe ti ọmọ Jọjọ tó sá?”

“A á ti í ṣe é tá à á fi í tẹ́, ẹyin iyá mi àgbà lọrùn-un?” 90

Ṣé ẹ ń fọkàn sítàn mi ẹ̀yin èyàn mi?

Ṣé è ń fọkàn sítàn mi, ẹ̀yin èèyàn àtàtà?

Awọn àgbà tun fọkàn Mọ́kùú balẹ̀

Pé kó má mikan, kó ma kọminú,

Gìrì àparò lásan ni, kò séwu lóko 95

Ẹni yóó wodò lominú ń ko, ẹ̀rù ò bodò

Wọ́n ló dijọ́ igi ba ṣídìí tó ń rìn bi èèyàn

Wọ́n ló dijọ a bímọ ti ò tabẹ́ ìyá jáde

Nnáà nikú ayé tó lè pa Mọ́kùú.

Ọkàn Mọ́kùú wá balẹ̀ pẹ̀sẹ̀ 100

Kò pé wọn ò tìdí bí ọmọ Jọjọ tó fẹ́ẹ́ pa

Páwọn Èèbó ló fọmọ ṣe gbígbé nínú-un yeye

Nígbà ó fẹ́ dọ̀ràn nílé ìwòsàn

Ṣugbọ́n k’a mẹ́nu kúrò lára Mọ́kùú ká lọ wòyàwó ẹ̀ nílé

Ohun to ń ṣaya ńle kọjáa ti jáwéjura 105

Ń ṣe ló ń dáárìn látojú orun bì ọ̀rọ̀

Àṣééyàn ò nii gbàlùbọ́sà ko hẹ̀fọ́ láyé

A ò ní í gbéwọ̀ sómi kó p’ekú fún wa

Ó ṣèèwọ̀

Ohun a gbìn ní ó hù, ẹni gbin oró kó rántí ọ̀la 110

Ìkà ò ní í f’oníkà sílẹ̀, ire á maa bẹ́ni ire.

Báyìí ló ṣèyàwó tó gbákúlá láìròtẹ́lẹ̀

Tó rọ̀run alákeji, ọ̀run àrèmabọ̀

Ká tún lọ rèé wọmọ Jọjọ níbi ó gbé ń ṣe tiẹ̀.

Wọ́n láìdúró nijó, ń ṣe lọmọ múṣẹ́ ṣe 115

Ó ti ṣe ohun gbogbo ní gírí mọ́káí, ó ti kógun jọ.

Wọ́n ti ṣígun tìpá tìkúùkù pàdé Mọ́kùú.

Ọ̀rọ̀ dọ̀rọ̀ tán, ó wa dojú ọlọ́mọ ò tó o

Àwọn ológun ọmọ Jọjọ ti já ẹ̀ka igi kọ̀ọ̀kan dání

Láti fi ṣèdáàbòbò iye wọn. 120

Mọ́kùú r’ígi tó ń bọ̀, lóòótó,ọ̀rọ̀ gbàrònú

Ṣùgbọ́n èrò ti tán, èrò tun si kù

“À f’ẹni t’óbìnrin ò tìdí bí, eléyùn-ún-ùn nìkan

N ló lè rọ́ba mú, lo lè rọ́ba fi ṣeun

K’á sì tó rírú èyí, ó di sánmọ̀ lókè. 125

Báyìí lọbá rò láìmọ̀ pétàdógún ti kù si dẹ̀dẹ̀,

Pọ́jọ́ ẹ́lẹ́sìn-ín ọbá kọ̀la.

Wọ́n d’ójú agbo, ọ̀rọ̀ dọ̀rọ̀ ìjà

Kìnìún pàdé ẹkùn, nǹkan ṣe

Ojú ìjà kúkú lọmọ Jọjọ ti fi tóba létí 130

Póbìnrin ò bí òun, ṣe ni a gbe òun nínú abo.

Èèmọ̀ lu kutu pẹ́bẹ́, ń ṣe lọ́wọ ọba rọ

Ọmọ Jọjọ toju ọba yọdà, o tẹ̀yin rẹ̀ kì í s’ákọ̀,

Mọ́kùú ṣe bẹ́ẹ̀, o kú, igí dá!

Mọ́lọmọ́ ṣe bẹ́ẹ̀ ó lọ, nǹkan ṣe. 135

Èyìn èyí náà nìlú fẹnu kò

Pọ́mọ Jọjọ lọbá yẹ

Wọ́n f’ọmọ Jọjọ jọba, ìlú rọ̀sọ̀mù

Gbogbo wa la kúkú mọ̀ pé 1

Eku tó da’ èyí silẹ̀ là ń pè lẹ́dá. 140

Aya ladárúgúdù

Òun ló sún Mọ́kùú dọ́gbùn-un àìnísàlẹ̀.

N náà ni a wáá kúkú rò pọ̀ o jèe,

N la ṣe ní tá a, bá fẹ́ẹ́ f’áya

Ká ṣàdúà, ká ṣètùtù 145

Ká bọrúnmọlè, ká bòòṣà

Kórí má faya aláya ṣaya fún wa, ẹ ṣàmín ẹ̀.

Yoruba for Academic Purpose

Saturday, 6 June 2015

MỌ́KÙÚ

No comments:

Post a Comment