Yoruba for Academic Purpose: ÌSÌNKÚ ABÍNIBÍ YORÙBÁ

Bóníkẹ́kẹ́ bá fi kú

Tọ́lọ́bọ̀rọ́ bá fò ṣánlẹ̀

Tálábàjà sì ráyé sá

Ǹjẹ́ mo bi ọ ìwọ ọmọ Yoòbá

Báwo lo ó ṣe sin wọ́n? 5

Báwo ni o ó ṣe ṣe ọ̀mẹ̀tọ́

Kí ó se ọ̀mètọ́ tán

Kó o tún ṣọ̀mẹ̀yẹ pẹ̀lú ẹ̀

O tún léyìí kà ọ́ láyà

Ó kà ọ́ láyà ó tóbí fún ọ 10

O ò fara balẹ̀ o má fòró ẹ̀mí ẹ

O jẹ́ n ṣí ọ lójú n là ọ́ lọ́yẹ

N là ọ́ lọ́yẹ n fọ̀nà hàn ọ́.

Ǹjẹ́ ìwọ tilẹ̀ mọ̀

Pé Yoòbá ò lọ́wọ́ nínú à ń boyún-ún jẹ́? 15

Ìyẹn látìbẹ̀rẹ̀ ayé wá

Mo mọ̀ pé o ó bi mí pé

Ó ṣe yé mi

Ojú ò ṣàìmọ̀ ohun tó kúngbá

Ojú ò ṣàìmọ ohun àwó gbà 20

Bòkùú jókùú inú

Bóyá oyún bàjẹ́ ni tàbí ó rọ̀ wàlẹ̀

Inú aṣọ funfun ni Yoòbá

Yóò lọ kò ipọ́n tó ṣe àti ọ̀lẹ̀ tó rọ̀

Lọ sin láàtàn 25

Èyí fi hàn gbangba

Pé inú la ti ń ka oyún mọ́ ara wa

Ẹni sì pa irú èyí pààyàn

Ṣùgbọ́n tọ́mọ bá kú ní pínísín

Ní bí ọdún méjì, mẹ́ta, bó tilẹ̀ ṣe

mẹ́fà 30

Inú àkísà ni wọ́n ọ́n kó eléyún-ùn sí

Tí wọ́n ó lọ rèé sin sígbóńgbó

Tí wọ́n ó lọ rèé sin sáàtàn

Ṣùgbọ́n tókùú bá ti ń dòkú ọ̀dọ́

Ó ti ń dòkú àgbá nù-un 35

Òkú agbà òkú tó ń gba pósi

Bí wọ́n kò sìn in si ẹsẹ̀ ilé

Wọn a si ín sí ojútò

Aráyé a sunkun sunkún

Ṣé o ń fọkàn bá ọ̀rọ̀ mi lọ ìwọ ọ̀rẹ́ẹ̀

mi 40

Mo rò pé o kò ni ibi í lọ

Torí ọ̀rọ̀ pọ̀ lẹ́nu

Ọ̀rọ̀ pọ̀ létè mo níun-un wí

Mo níun-un wí mo níun-un sọ

Òkú àgbà lòkúu yààrá 45

Òun lòkú ọ̀ọ̀dẹ̀ níbì bàbá ń gbàlejò

Tágbà bá nílé tó lọ́nà, ìlé ni wọ́n ń sin irúu wọn

Táráyé yóò máa jori, jẹ̀kọ, jàmọ̀là, jọ̀kà!

Ọ̀gọ̀rọ̀ọ mèháyà àgbà nìkan ni

Wọ́n ń sìnkú wọn síta gbangba 50

Ìdí ìsìnkú àgbà sílé kọ́ lo sọ?

Ọrọ̀ tún dọ̀rọ̀ à ń relé aláwo dífá

Awó ní á fobì bọríi bàbá ẹni

Èyí kò ní pé a ń fẹ̀dí ẹni sítàa

Inú yààrá ẹni lá ń bọ́ sí ṣerú ẹ̀. 55

Bó sì jẹ́ àdúà la gbà

Tọ́rọ̀ dì bàbá ẹ̀ á gbè é

Inú ọ̀ọ̀dẹ̀ là á tì í ṣawo irúu wọn

Ká kúrò léyún-ùn ká bọ́ síkú awo

Mo ti ń wòkú ògbóni ọ̀ná ti na 60

Ọjọ́ ṣẹ̀ẹ̀ jìnà

Húrùhúrù réè bojú mi mé rí ǹǹkàn kàn

Mo ní kí n kúkú jẹ́wọ́ ọ̀bùn

Kẹ́ẹ́ dáṣọ ró mi

Báwo bá kú awo ní sìnkú awo 65

Ọ̀gbẹ̀rì a sìnkú ọ̀gbẹ̀rì

Tògbóni lojú ò tó, ó tò toníṣàngó bọ̀

Mo mọ bá a ṣeé sìnkú ẹni àrá pa

Bírúu wọn bá kú, oníṣàngó ní í sìnkú wọn

Ètùtù a pọ̀ pọ̀ pọ̀ 70

Gbogbo ohun wọ́n ń mú bọ Ṣàngó

Ní wọ́n a gbà lọ́wọ́ olúwa rẹ

Ṣójú bọ̀rọ̀ kọ́ lẹlẹ́sìn tọ́húnwá fi ń yin Ṣàngó tẹ́lẹ̀

Torí bóníṣàngó wí lógún

Tó wí lọ́gbọ̀n pẹ̀lú ẹ̀ 75

Ẹ̀lẹ́sìn tọ́hùnwá á ní àfi dandan àfi ẹni toun ń sìn

Ṣùgbọ́n jé kí àrá bù yẹ̀rì

Kó sáná láìrọ̀ òjò

Ẹni a wí á ló dọwọ́ rẹ o Ṣàngó ọkọ Ọya

Àwọn onísànpọ̀nná náà ló ń sin 80

Irú òkúu ti wọn.

Ìyẹn ẹni ìgbóná pa tàbí tí Sànpọ̀nná dàlù

Olóde fúnra rẹ̀, ò sọ gbogbo ilé dahoro

Gbogbo ohun òkú pátápátá ni wọn ó gbà tèfètèfè

Èyí ló jẹ́ kí n mọ pé Yoòbà 85

Mọ Sáyẹ́ǹsì tó pọ̀ jù!

Wọn a gbé òkúu sànpọnná pamọ́

Pamọ́ sínú ìkòkò

Omi ara òkú a máa ṣe sọ̀ọ̀rọ̀sọ̀ kalẹ̀

Wọn a nà án sá sóòrùn 90

Bó pẹ́ omi ara a gbẹ,

Ibi a bá fẹ́ ẹ sí

Nǹkan a ṣènìyàn

Ọ̀rọ̀ wáá dilé ògún onire ọkòọ̀ mi

Iyèkan agbólú-irin, àjàǹgbódó èrìgì 95

Koriko òdò tí í rú mìnìmìnì

Bọ́rọ̀ bá dọ̀rọ̀ ẹní fọ̀bẹ gbánú

Tàbí tí ó yànbọn jẹ

Tàbí tá a fọ̀bẹ gbá nínú tàbí tí a yànbọ̀n kò

Àwọn ológùn-ún náà ní í sin wọ́n 100

Láti gbà ìwáṣẹ́

Wọn a gbohùn ìnì òkú

Wọn a mu ṣètùtù

Kọ́rọ̀ wáá dorí òkú omi

Ìyẹn ẹni omi gbé lọ tódò rù rè 105

Bóníyemọja bá ń bẹ

Àwọn ní í sìnkú wọn sípadò

Wọn a gbà gbogbo ohun ìní ẹní lọ

Wọn a mú ṣètùtù

Mo ti rè, mo ti ṣẹ̀hìndé, èmi ẹni ìgbà kàn 110

Mo rántí ẹni igi wólù, ẹni igí pa

Ìsìnkú èyí pé méjì n tètè fọ̀

Bó bá kú sídìí igi

Ìdí igi náà nigi í wọ́wé sí

Ṣùgbọ́n tó bá délé ó tóó kú 115

Eléyún-ùn tún yàtọ̀

Ilé ni wọ́n ń sinrúu wọn sí láìsọsẹ̀

Ọjọ́ kò tọ́jọ́ ọjọ́ kò tọ̀jọ̀

Níjọ́ọ bàbá ìsàlẹ̀ ọjà pokùnso

Akíntúndé oníbàtá kò dúró dọlọ́mọle 120

Gbogbo aráyé ń ké, èró ń pariwo

Ìgbẹ́ ń mì rìyẹ̀

Bí kò sí tàwọn olórò

Òró lòkú ìbá rà sí

Àwọn olórò ló dé wá sìnkú bàbá 125

Àná ni mo tibì kan dé ẹnú kọròyìn

Níbi mo gbọ́kú adẹ́tẹ̀ lóko wọn

Abọ́dúndé ṣe nǹkan lọ́jọ́ ọ̀hún, ẹ̀rín pànìyàn

Gbogbo ohun ìní adẹ́tẹ̀ ló ko jo lọ́kọ̀ọ̣̀kàn

Ó fi iná sáhéré nígbó tòkútòkú tohun ìní rẹ̀ 130

Inú igbó ladẹ́tẹ̀ kúkú ń gbé, ìyẹn ti hàn

Ìbànújẹ́ gbàlú, ọ̀fọ̀ gbòde kan

Níjọ́ táboyún kan fò sánlẹ̀ tó kú

Àwọn olórò layé ké sí wáá sìnkú èèmọ̀

Ọ̀tọ̀ ni wọ́n sìnkú inú, ọ̀tọ̀ ni ti yeye 135

Abuké ti kú, mo gbọ́, eni òrìṣà

Tẹrùtẹrù labukéé wọ̀lú lèyí mo kọ́ gbọ́

Wọ́n gbẹrù sílẹ̀ lọ́wọ́ ẹlẹ́rù

Wọ́n ti gbogbo wọn bọ̀ kòkò ọ̀tọ̀

Ìkòkò yìí ni wọ́n yóò gbé lọ igbó 140

Lọọ rì dohun ilẹ̀

Ọ̀rọ̀ yìí ṣẹ̀ wá ń parí bọ̀, ó ku ẹrú ẹni

Ẹrú yàtọ̀ séèyàn gidi, mo ṣe bẹ́ ẹ mọ̀ bẹ́ẹ̀

Abẹ́ ìgbàsọ̀rọ̀ là á sìnkú èyí sí

Kó fìyàtọ̀ hàn 145

Ọ̀rọ̀ dorí onígbèsè tó ń gbówó ẹni kọ́gi

Orí igi ni wọ́n ń sinrú èyí sí

Nígbà ìgbà ṣẹ̀ṣẹ̀ ṣẹ̀

Kó lè fi han aráyé pé gbèsè kò sunwọn

Kúsílé kúsílé sàn jù ká kú sílé àna 150

Aláìnítìjú lọọlé àna rèé kú sí kò wùnìyàn

Ojúu fèrèsè ni wọ́n ọ́n gbé

Irú òkú bẹ́ẹ̀ bá jáde

Gbogbo tapá titan á ti já tán kó tóó yọ

Ọ̀rọ̀ kan eégún ńlá tí í kẹ́yìn ìgbàlẹ̀ 160

Èyí n ni ọba

Báyìí là á ṣe nílée wa, ó ṣèèwọ̀ lọ́hùn-ún nì

Ọ̀nà tí Yoòbáá gbà sin ọba pẹ́gbàágbèje

Sùgbọ́n ohun a mọ̀ ni pé

Òkú ọlá òkú iyì 165

Lòkú ọba i ṣe

Kárìn ká pọ̀, yíyẹ ní í yẹni

Kò jẹ́ dánìkàn rìn

Erú á lọ

Aya á lọ 170

Òpọ̀ ounjẹ a sì kún sàréè

Gbogbo rẹ̀ fún jíjẹ lọ́nà òrun

Àrẹ̀mọ ọba tilẹ̀ ń bọ́ba lọ nílẹ̀ ibì kan

Láti rèé jayé!

N ò ní í sọ jèyí ọ̀rọ̀ pọ̀ níkùn 175

Àmọ́ mo fẹ́ẹ́ mẹ́nu ro

Kí n mẹ́nu ró kí n mu gáà ife omi

Kí n tìlẹ̀kùn ètè

Lórí ìsìnkú àbìnibí Yoòbá lóriṣiríṣi

Ẹni wà láyé tó ní tòun bàjẹ́ 180

Ẹní kú, emi ni ó ṣe?

Kólúwa fikú ire pani, iyẹn wùnìyàn!

Yoruba for Academic Purpose

Thursday, 4 June 2015

ÌSÌNKÚ ABÍNIBÍ YORÙBÁ

No comments:

Post a Comment