Ẹ FORÍ JÌN MÍ

 

Mo mọ̀ pé tẹ ẹ bá rèyìí

Mo mọ̀ póhun tẹ́ ó bèèrè

Ni pé, ta ni ń jẹ́ mi?

Ta lèyí tó ń tẹlẹ̀ ṣùàṣùà

Ẹ dákun  ẹ má bínú                           5

Ẹ fiyè dé sàlẹ̀ ikùn

Ọmọdé ni mo jé, n ò ṣọ̀yájú

Ìdánwò ni mo gbà, ẹ yé bá mi gbà á bẹ́ẹ̀

N ò kúkú mọbẹ̀ẹ́ sè

Ẹ má bínú pé ó láta                           10     

Àwọn àgbà ló bẹ̀ mí ńṣẹ́

Mo sì ṣe kí n sá

Ṣùgbọn ẹni tí Aláàfin bẹ̀ níṣẹ́ ni

Tódò Ọbà sì kún

Ìrònú di méjì, ká bomi sẹ́nu fẹ́ná       15

Iná ò gbọdọ̀ kú, omi ò gbọdọ̀ dànù

Odò ọbà ṣòroó kán lù

Iṣẹ́ ọba ṣòroó ṣàijẹ́

Ni mo ṣe ṣe bí òjíṣẹ́ náà ṣe ṣe

Mo ní kí á fìyànjú ṣe gbígbà              20

Pé bí ó bá kù díẹ̀ káàtó

Kẹ́ ẹ bá mi tún un ṣe

Bó sì ṣe gbígbà bẹ́ẹ̀ náà ni

Kẹ́ ẹ bá mi gbà á bẹ́ẹ̀

Kẹ́ ẹ bá mi fi mọ́ra                             25

Kọ́rọ̀ wá dàbí isó inú ẹ̀kú

Kẹ́ ẹ bá mi ṣe é ní àgìdímọ́làjà, awo Ifẹ̀

Níbi tí àwọn awo ti ń ṣe ìgbọ̀wọ́ ara wọn

Tí títẹ́ sì jìnà sáwoo wọn tèfètèfè

Tọ́rọ̀ wáá dà bí ọmọ babaláwo        30

Tí babaa rẹ̀ dolóògbé

Lọmọ bá bọ́ síwájú àwọn awo

Ló yílẹ̀ sọ́tùn-ún, ló yílẹ̀ sósì

Ló figbe bọnu, ló ń ké tantan

Ó lóun ò mọdá ọwọ́                           35

Òun ò mọkẹrẹrẹ Ẹbọ íha

“Ẹwáá bá mi tọ́rọ̀ yí ṣe o, ẹ̀yin àgbà”

Ǹjẹ́ àbọ̀ mi rè é o

N ò mọ̀kan

N ò mọ̀kàn                                40

Ẹ dákun ẹ bá mi gbà á bẹ́ẹ̀

Kẹ́ ẹ fìyókù ṣàforíjìì mi