Yoruba for Academic Purpose: Kémísìrì fún Alákọ́ọ̀bẹ̀rẹ̀ (Chemistry for Beginners) - Ìdánilẹ́kọ̀ọ́ Kìíní (First Lecture)

L.O. Adéwọlé àti A.A. Fábẹkú

Kí ni Kẹ́mísírì? (What is Chemistry?)

Kẹ́mísírì jẹ́ ẹ̀ka sáyẹ́ǹsì àrígbéwọ̀n tí ó ṣe é dán wò . Ó tún jẹ́ ẹ̀ka ìmọ̀ tí ó ń kọ ni nípa èròjà , ìhun àti ìyídà ohun-ẹ̀dá (substance) tí ó wà nínú àgbálá ayé .

Kí ni Ẹ̀dá? (What is Matter?)

Ẹ̀dá ni ohunkóhun ti ó bá ní ìwọ̀n-okun tí ó sì gba àyè. Ohun tí a ń pè ní ẹ̀dá yìí lè tóbi ó sì lè kéré. A lè fi ojú rí i (tí ó bá tóbi tó nǹkan tí a lè fojú rí) tàbí kí a má lè fi ojú rí i (tí ó bá kéré ju ohun tí a lè fojú wa lásán rí tí ó jẹ́ pé yóò nílò awò amóhuntóbi (magnifying glass) kí á tó lè rí i). Ṣùgbọ́n sá o, ohun tí ó ṣe pàtàkì ni pé bí ó ti wù kí nǹkan náà kéré tó, ohunkóhun tí ó bá ti ní ìwọ̀n-okun (mass) àti ìwúwo (weight) , ẹ̀dá ni. Ìwọ̀n-okun (matter) àti ìwúwo (weight) bá ara wọn tan, ṣùgbọ́n, síbẹ̀, wọ́n yàtọ̀ sí ara wọn gédégédé. Àwọn àpẹẹrẹ ẹ̀dá ni afẹ́fẹ́, omi, òkúta, igi, gbogbo ohun ọ̀gbìn, ẹranko, ènìyàn, àwọn alùgbinrin àti gbogbo ohun tí ó yí wa ká, yálà èyí tí a lè fi ojú rí tàbí èyí tí a o kò lè fi ojú rí.

Kí ni Ìwọ̀n?

Ìwọn ni iye ẹ̀dá (matter) tí ó wà nínú ohun-ẹ̀dá (substance). Ìwọ̀n ni àbùdá tí ẹ̀dá ní tí ó fi máa ń fẹ́ wà loju kan láìparadà tàbí kí ó máa lọ láìdúró.

Kí ni Ìwúwo (Weight)?

Ìwúwo (weight) ni ìmọ̀lára ipa tí òǹfà ayé (gravity) ní lórí ìwọ̀n (mass) .

Àbùdá Ẹ̀dá

A lè dá ẹ̀dá (matter) mọ̀ nípa wíwo oríṣiríṣi àbùdá tí ó ní. Oríṣi àbùdá méjì ni ẹ̀dá ni. Èkíní ni àbùdá òde tí ẹ̀dá ní. Èkejì ni àbùdá inú tí ẹ̀dá ní. Àbùdá ẹ̀dá jẹ́ èyí tí a lè rí, tí a lè fi ọwọ́ kàn tàbí tí a lè wọ̀n nípa lílo ojú wa, etí wa, ahọ́n wa, àti bẹ́ẹ̀ bẹ́ẹ̀ lọ. Ó ṣeé ṣe kí ó jẹ́ pé a máa nílò àwọn ohun tí ó jẹ mọ́ ẹ̀rọ kí á tó lè lo ọ̀kan tàbí òmíràn nínú àwọn ẹ̀yà ara tí a kà sókè wọ̀nyí kí ó tó lè mọ àbùdá ẹ̀dá .

Àwọn Abùdá Òde tí Ẹ̀dá Ní

Ìtọ́wò: Ìtọ́wò (taste) ni ó ń jẹ́ kí á mọ bí nǹkan kan bá dùn tàbí ó korò tàbí ó kan.

Àwọ̀: Àwọ̀ (colour) ni ó jẹ́ kí á mọ bóyá funfun ni nǹkan kan tàbí gbúre (pink) tàbí pupa (red) tàbí òfeefèé (yellow) tàbí omi ọsàn (orange), tàbí sányán (brown) tàbí dúdú tàbí aró (blue) tàbí eérú (grey) tàbí ẹsẹ̀ àlùkò (purple).

Òórùn: Òórùn (odour) nǹkan lè jẹ́ òórùn kíkan, òórùn dídùn, òórùn ìdíbàjẹ́, ati bẹ́ẹ̀ bẹ́ẹ̀ lọ.

Yíyòòrò:Yíyòòrò (solubility) níí ṣe pẹ̀lú pé ṣé nǹkan kan lè yòòrò tàbí kí ó yọ́ kí ó di omíyòrò .

Líle: Líle (hardness) níí ṣe pẹ̀lú pé ṣé nǹkan tí a ń sọ̀rọ̀ nípa rẹ le, ṣé ó ṣòro láti tẹ̀, ṣé ó ṣòro láti gé, ṣé ó ṣòro láti kán tàbí pé ṣe ni nǹkan náà dúró ṣinṣin.

Dẹ́ńsítì: Eléyìí ní í ṣe pèlú fífúyẹ́ tàbí wíwúwo nǹkan tí a bá fi ojú àlàfo tí nǹkan náà gbà wò ó. A lè rí nǹkan kan tí ó tóbi tí ó sì fúyẹ́ a sì lè rí nǹkan kan tí ó kéré tó sì wúwo. Tí a bá ti ń fi ojú àbùdá fífúyẹ́ tàbí wíwúwo yìí wo nǹkan, ojú dẹ́ńsítì ni a fi ń wo nǹkan náà nìyẹn.

Ìṣeé-fìrọ̀rùn-yí-padà : Àwọn ohun ẹ̀dá (substance) kan wa tí ìrísí wọn rọrùn láti yí padà. Bí àpẹẹrẹ, alugbinrin ka tí ó rọrùn láti yí ìrísí rẹ̀ padà sí ìrisí mìíràn ni òjé (lead). Bí irísí òjé bá rí pẹlẹbẹ, a lè yí i pa sí gígùn gbọọrọ bí okùn. Bí ìrísí rẹ̀ bá sì rí gbọọrọ bí okùn, a lè yí i padà sí pẹlẹbẹ.

Ìrísí Ìdì : Eléyìí níí ṣe pẹ̀lú pé bóyá ohun ẹ̀dá kan ti dì tàbí kò dì tí ó sì ní ìwò kan tàbí òmíràn.

Bí Ìwò Nǹkan Kan Ṣe Rí Nígbà tí Ìgbóná Ojú Ọjọ́ bá bá ti Inú Ilé Dọ́gba : Ní àsìkò tí ojú ọjọ́ kò gbóná jù tí kò sì tutù jù yìí, ǹjẹ́ a lè sọ pé ẹ̀dá jẹ́ ohun tí ó dì tàbí ohun tí ó jẹ́ olómi tàbí kí ó jẹ́ gáàsì .

Ọ̀gangan Yíyọ́ : Ọ̀gangan yíyọ́ yìí ni ibi tí ìgbóná yóò dé tí ohun-ẹ̀dá yóò fi yọ́ tàbí kí ó yòòrò. Bí àpẹẹrẹ, ìgbóná tàbí iná tí yóò mú orí yọ́ tàbí kí ó yòòrò kò lè tó èyí tí yóò mú irin yọ́. Ìyẹn ni pé iná tí yóò mú irin yọ́ yóò ju ti òrí lọ. Ọ̀gangan yíyọ́ ni ibi tí nǹkan abara líle máa ń gbóná dé kí ó tó di olómi.

Ọ̀gangan Híhó : Ọ̀gangan híhó ni ibi tí iná yóò se nǹkan dé tí nǹkan olómi náà yóò fi máa hó tàbí ibi tí ìgbóná yóò wọ inú nǹkan oĺómi tí ó fi máa hó. Ọ̀gangan híhó yìí ni nǹkan olómi ti máa ń di nǹkan aláfẹ́fẹ́, ìyẹn gáàsì. Bí àpẹẹrẹ, epo tètè máa ń hó ní orí iná ju omi lọ. Èyí fi hàn pé ìgbóná tí yóò mú epo yí padà sí afẹ́fẹ́ kò lè tó ti omi.

A kò lè ṣe ìgbéléwọ̀n bí ìtọ́wò (taste) àti òórùn ṣe tó. A lè ṣ ìgbéléwọ̀n àwọn àbùdá yòókù.

Endnotes

Ní èdè Gẹ̀ẹ́sì, a ń pe nǹkan kan ní substance. Substance ni a lè pè ní ohun tí ó níí ṣe pẹ̀lú ẹ̀dá (ohun ẹ̀dá, ìyẹn ohun tí a dá) tí ó jẹ pé a lè fi ojú rí tàbí kí a fọwọ́ kàn tàbí kí ó ṣeé wọ̀n. Tí a bá ń kọ́ ẹ̀kọ́ nípa ohun tí a ń pè ní substance yìí àti ọ̀nà tí a fi lè tò ó (combine) mọ́ irú rẹ̀ mìíràn tàbí kí ó torí nǹkan tí ó ṣẹlẹ̀ sí irú rẹ̀ mìíràn ṣe nǹkan kan (react), irú ẹ̀kọ́ yìí ni a ń pè ní Kẹ́mísírì. Ìyẹn ni pé Kẹ́mísírì níí ṣe pẹ̀lú àtòpọ̀ (combination) tàbí ìtakora (reaction) ohun ẹ̀dá (substance).

Àrígbéwọ̀n ni ohun tí a lè fojú rí tàbí tí a lè fọ́wọ́ kàn tàbí tí a lè wọ̀n.

Tí a bá dán nǹkan wo, a fẹ́ mọ bí nǹkan náa ti rí ni.

Tí a bá fọ́ nǹkan kan sí wẹ́wẹ́, ohun tí a bá bá nínú rẹ̀ ni èròjà nǹkan náà.

Bí a ṣe to nǹkan pọ̀. Ètò tí nǹkan kan ní ni a ń pè ní ètò nǹkan náà.

Àyídà tàbí ìyídà máa ń yí nǹkan padà ni, ní ọ̀pọ̀ ìgbà, kí nǹkan náà lè dára sí i.

Àgbálá ayé (universe) dúró fún àwọn ìràwọ̀ àti ayé àti àwọn ẹlẹgbẹ́ wọn mìíràn tí ó yí oorùn po.

Ẹ̀dá tàbí èròjà ẹ̀dá dúró fún matter. Ẹ̀dá yìí ni ohun-ẹ̀dá (substance) tí a lè fi ojú rí tàbí tí a lè fi ọwọ́ kàn tàbí tí a lè wọ̀n.

Mass ni a ń pè ní ìwọ̀n-okun nínú Kẹ́mísírì. Tí ó bá jẹ́ inú ẹ̀kọ́ Físíìsì (Physics) ni, ìṣù tàbí títóbi nǹkan ni a ó pè é.

Weight yìí ni a ń pè ní ìtẹ̀wọ̀n nínú ẹ̀kọ́ Físíìsì (Physics). Lára oríkì (definition) tí a lè fún ìtẹ̀wọ̀n (weight) nínú ẹ̀kọ́ Físíìsì (Physics) ni (i) ipá (force) tí ó dorí kọlè tí nǹkan kan ní nítorí títóbi (mass) rẹ̀ (ii) ìmúrasáré (acceleration) nítorí ìfàlọsílẹ́ ilẹ̀ ayé (gravitational pull).

Ayé ní òǹfà tí ó fi máa ń fa àwọn ohun tí ó wà ní inú rẹ̀ (ìyẹn àwọn ohun tí ó wà ní inú ayé) wá sí orí ilẹ̀ tàbí kí ó fa nǹkan náà mọ́ra. Èyí ni a ń pè ní ipa òǹfà (force of gravity).

Àbùdá ni ìrísí tí nǹkan kan ní. Èyí ni ohun tí a máa ń wò mọ́ nǹkan kan lára tí ó fi yàtọ̀ sí nǹkan mìíràn.

Physical properties ni àwọn àbùdá òde tí èdá ni.

Chemical properties ni àwọn àbùdá inú tí ẹ̀dá ní.
Bí àpẹẹrẹ, bí nǹkn kan bá kéré jù, a lè nílò awò amóhuntóbi (magnifying glass) kí a tó lè rí àbùdá rẹ̀ dáadáa.

Solution ni a ń pè ní omíyòrò.

Àlàfo tí nǹkan kan gbà ni a ń pè ní volume nǹkan náà.

Malleability ni a ń pè ní ìṣeé-fìrọ̀rùn-yí-padà.

Metal ni a ń pè ní alùgbinrin. Alùgbinrin dúró fún ohun tí ó lè dún bí irin bí a bá lù ú.

Crystalline form ni a ń pè ní ìrísí ìdì.

Shape ni a ń pè ní ìwò.

Physical shape at room temperature ni èyí dúró fún. Ní àsìkò yìí ni a máa ń sọ pé nǹkan kan kò gbóná, kò tutù.

Matter ni a pè ní ẹ̀dá.

Solid ni a pè ní ohun tí ó dì. Èyí ni nǹkan tí ó jẹ́ abara líle tí ó ṣeé gbámú.

Liquid ni a pè ní olómi.

Nǹkan aláfẹ́fẹ́ ni gáàsì, bí àpẹẹrẹ, isó, afẹ́fẹ́ tàbí ooru. Gaàsì kò seé gbámú bẹ́ẹ̀ ni kò ṣeé mú dání. A lè bu omi dání ṣùgbọ́n kò ṣeé gbámú. A lè gbá nǹkan tí ó bá dì mú bẹ́ẹ̀ ni a lè gbé e dání.

Melting point ni a ń pè ní ọ̀gangan yíyọ́.

Temperature ni a pè ní ìgbóná.

Shea-butter ni a pè ní òrí.

Boiling point ni a ń pè ní ọ̀gangan híhó.

Quantitative evaluation ni a pè ní ìgbéléwọ̀n bí wọ́n ṣe tó. Bí wọ́n ṣe tó yìí lè jẹ́ nípa kíkà tàbí wíwọ́n. Bí àpẹẹrẹ, a kò lè ka òórùn tàbí kí á wọ̀n ọ́n bẹ́ẹ̀ ni a kò lè ka ìtọ́wò tàbí kí a wọ̀n ọ́n. Ìyẹn ni pé a kò lè ka bí kíkan ni nǹkan kan ṣe rí lẹ́nu nígbà tí a tọ́ ọ wò tàbí dídùn.

Yoruba for Academic Purpose

Monday, 27 April 2015

Kémísìrì fún Alákọ́ọ̀bẹ̀rẹ̀ (Chemistry for Beginners) - Ìdánilẹ́kọ̀ọ́ Kìíní (First Lecture)

No comments:

Post a Comment