Yoruba for Academic Purpose: Èdè Yorùbá ní Ṣókí

Èdè alóhùn ni èdè Yorùbá. Ìró ohùn mẹ́ta ni ó wà nínú èdè náà. Àwọn ìró ohùn náà ni ìró ohùn òkè (bí àpẹẹrẹ, ìró ohùn tí ó wà lórí “ó wá”), ìró ohùn ìsàlẹ̀ (bí àpẹẹrẹ, ìró ohùn tí ó wà lórí “kò wẹ̀”) àti ìró ohùn àárín. A kì í lo àmì kankan láti fi ìró ohùn àárín hàn àyàfi ìgbà tí kọ́ńsónáńtì àránmú aṣesílébù bá ní ìró ohùn àárín ni a máa ń lo àmì yìí, “-”, bí àpẹẹrẹ, àmì ohùn àárín ni àwọn fáwẹ́lì inú “ọmọ” ní bẹ́ẹ̀ náà ni “n” tí ó jẹ́ kọ́ńsónáńtì àránmú aṣesílébù inú “gbangba” ṣe ní àmì ohùn àárín.

Ìró fáwẹ́lì àránmúpè márùn-ún ni èdè Yorùbá ní. Àwọn náà ni:

an, ẹn, in, ọn, un.

Àwọn ìró kọ́ńsónáńtì tí ó wà nínú èdè Yorùbá ni:

b, d, f, g, gb, h, j, k, l,

m, n, p, r, s, ṣ, t, w, y

Ọ̀pọ̀lọpọ̀ ọ̀rọ̀ ni a ti yá wọ inú èdè Yorùbá láti inú èdè mìíràn. Àwọn kan jẹ́ àfetíayá (bí àpẹẹrẹ: báíbù, pẹ́ńsù, abbl.), àwọn kan sì jẹ́ àfojúyá (bí àpẹẹrẹ: bíbélì, tábìlì, abbl.). Láti fi ara àwọn ọ̀rọ̀ àyálò mọlé, a lè pín ìṣùpọ̀ kọ́ńsónáńtì inú ọ̀rọ̀ èdè mìíràn níyà (bí àpẹẹrẹ, French – faransé, break – búréèkì, abbl.), a lè dín ìṣùpọ̀ kọ́ńsónáńtì kù sí ẹyọ kan (bí àpẹẹrẹ, station – tésàn), a sì lè fi fáwẹ́lì kún ọ̀rọ̀ tí kọ́ńsónáńtì bá parí rẹ̀ (bí àpẹẹrẹ, gem – jẹ́ẹ̀mù).

Nínú afọ̀ geere, a máa ń pa ìró jẹ (bí àpẹẹrẹ, etí ilé – etílé, àdúrà – àdúà), a máa ń jẹ́ kí àránmọ́ wáyé (bí àpẹẹrẹ, ilé ìwé – iléèwé, ará ọ̀run – arọ́ọ̀run, oní ẹja - ẹlẹ́ja, abbl.) a sì máa ń jẹ́ kí ìyọ́pọ̀ fáwẹ́lì ṣẹlẹ̀ (bí àpẹẹrẹ dá ọpẹ́ – dúpẹ́). Nínú gbogbo ìgbésẹ̀ fonọ́lọ́jì wọ̀nyí ni àsúnkì ti lè wáyé (bí àpẹẹrẹ, gbẹ́ odó – gbẹ́dó).

Ìhun gbólóhùn tí àyídá kò tíì ṣẹlẹ̀ sí ni olùwà+ọ̀rọ̀-ìṣe+àbọ̀ , bí àpẹẹrẹ, Olú na Adé níbi tí Olú ti jẹ́ olùwà tí nà jẹ́ ọ̀rọ̀-ìṣe tí Adé sì jẹ́ àbọ̀. Ẹ̀yán ni ó máa ń tẹ̀ lé orí nínú awẹ́-gbólóhùn aṣàpèjúwe (bí àpẹẹrẹ “aṣọ tí mo rà” níbi tí “aṣọ” ti jẹ́ orí tí “tí mo rà” sì ń yán an). Bákan náà ọmọ ṣe orí nínú àpólà orúkọ tí kò ní ju ọ̀rọ̀-orúkọ àti ẹ̀yán rẹ̀ lọ (bí àpẹẹrẹ, “ọmọ pupa” níbi tí “pupa” ti ń yán “ọmọ” tí “ọmọ” sì jẹ́ orí nínú àpólà náà).

Ọ̀rọ̀-atọ́kùn mẹ́ta ni ó wà nínú èdè Yorùbá. Àwọn náà ni “ti” (tí ó ń fi ibi tí nǹkan ti gbéra (source) hàn, bí àpẹẹrẹ “Mo ti Èkó lọ sí Ìbàdàn”), “sí” (tí ó ń fi àbáyọrí (goal) hàn, bí àpẹẹrẹ “Mo lọ sí Iléṣà”) àti “ní” (tí ó ń fi àyè (location) hàn bí àpẹẹrẹ, “Adé rí Olú ní Ojà”)[1].

Ọ̀rọ̀ àpọ́nlé máa ń tẹ̀ lé ọ̀rọ̀-ìṣe ni nínú èdè Yorùbá, bí àpẹẹrẹ “Olú lọ kíákíá” àti “Mo ṣe iṣẹ́ rí” níbi tí “kíákíá” àti “rí” ti jẹ́ ọ̀rọ̀-àpọ́nlé[2].

Ìgbóhúnsókè ni ó máa ń ya gbólóhùn àlàyé sọ́tọ̀ sí gbólóhùn ìbéèrè oní-bẹ́ẹ̀-ni-bẹ́ẹ̀-kọ́, “Olú wẹ̀” lè jẹ́ gbólóhùn àlàyé tí a kò bá gbé ohùn sókè lórí fáwẹ́lì “ẹ̀” tí ó parí gbólóhùn yìí ṣùgbọ́n tí a bá gbé ohùn sókè lórí rẹ̀, yóò di gbólóhùn ìbéèrè oní-bẹ́ẹ̀-ni-bẹ́ẹ̀-kọ́.

Àwọn atọ́nà wà tí a máa ń lò láti ṣe ìbéèrè nínú gbólóhùn ìbéèrè tí kì í ṣe oní-ni. Àwọn atọ́nà wọ̀nyí lè wà ní ìbẹ̀rẹ̀ tàbí òpin gbólóhùn. Àwọn kan tilẹ̀ gbà pé ó lè wà ní ààrin gbólóhùn pẹ̀lú. Gbogbo àwọn ọ̀rọ̀ tí a kọ yàtọ̀ ní ìsàlẹ̀ wọ̀nyí ni ó jẹ́ atọ́nà gbólóhùn ìbéèrè tí kì í ṣe oní-ni.

Ṣé Olú lọ?

Olú lọ bí?

Olú tíì dé?

Oríṣìí gbólóhùn ìbéèrè oní-ni méjì ni ó wà? Èkínní ni gbólóhùn ìbéèrè oní-ni alápèpadà, èkejì sì ni gbólóhùn ìbéèrè oní-ni aláìlápèpadà. Àpẹẹrẹ gbólóhùn ìbéèrè oní-ni alápèpadà ni (b) ní ìsàlẹ̀ yìí:

(a) Má fi ọwọ́ kàn án

(b) Má fi ọwọ́ kan kí ni?

Àpẹẹrẹ gbólóhùn ìbéèrè oní-ni aláìlápèpadà ni:

Ta ni ó ra aṣọ?

Bí ìrísí ọ̀rọ̀-arọ́pò-orúkọ èdè Yorùbá ṣe rí nì yí:

Ipò Olùwà

Ẹyọ Ọ̀pọ̀

Ẹni kìíní: mo (Mo ra iṣu) a (A ra iṣu)

Ẹni kejì: o (O ra iṣu) a (Ẹ ra iṣu)

Ẹni kẹ́ta: ó (Ó[3] ra iṣu) wọ́n (Wọ́n ra iṣu)

Ipò Àbọ̀

Ẹyọ Ọ̀pọ̀

Ẹni kìíní: mi (Ó rí mi) wa (Ó rí wa)

Ẹni kejì: ọ/ẹ (Ó rí ọ/ẹ) yín (Ó rí yín)

Ẹni kẹ́ta: àfàgùn fáwẹ́lì

ọ̀rọ̀-ìṣe (Ó rí i) wọn (Ó rí wọn).

Ẹ̀yán

Ẹyọ Ọ̀pọ̀

Ẹni kìíní: mi (Aṣọ mi) wa (Aṣọ wa)

Ẹni kejì: rẹ/ẹ (Aṣọ rẹ/ẹ) yín (Aṣọ yín)

Ẹni kẹ́ta: rẹ̀/ẹ̀ (Aṣọ rẹ̀/ẹ̀) wọn (Aṣọ wọn)

Yorùbá ní ọ̀rọ̀-arọ́pò afarajorúkọ. Ìrísí wọn nì yí:

Ẹyọ Ọ̀pọ̀

Ẹni kìíní: èmi (Èmi ni mo rí i) àwa (Ó rí àwa)

Ẹni kejì: Ìwọ (Ìwọ ni ó rí i) ẹ̀yin (Ó rí ẹ̀yin)

Ẹni kẹ́ta: òun (Ó rí òun náà) àwọn (Àwọn ni a rí i)

À lè ṣe àtúnpín ọ̀rọ̀-ìṣẹ Yorùbá sí ìsọ̀rí wọ̀nyí: ọ̀rọ̀-ìṣe ọ̀bọ̀rọ́ (àfàgùn fáwẹ́lì tí ó gbẹ̀yìn ọ̀rọ̀-ìṣe tí ọ̀rọ̀-ìṣe ọ̀bọ̀rọ́ tẹ̀ lé ni ó máa ń jẹ́ atọ́ka ọ̀rọ̀-ìṣe ọ̀bọ̀rọ́, bí àpẹẹrẹ, “Ó fẹ́ẹ́ lọ, Ó bẹ̀rẹ̀ sí iṣẹ́ẹ́ ṣe, Ó bẹ̀rẹ̀ síí lọ), ọ̀rọ̀-ìṣe aṣàpèjúwe (bí àpẹẹrẹ, “Ọmọ náà ga, Iṣu náà tóbi), ọ̀rọ̀-ìṣe oníbọ̀ (bí àpẹẹrẹ, “Ilẹ̀kùn bàjẹ́, Ó ba ilẹ̀kùn jẹ́), ọ̀rọ̀-ìṣe aláìlẹni (bí àpẹẹrẹ, Ó dára kí á pa àgọ́ mẹ́ta), ọ̀rọ̀-ìṣe àkànmórúkọ (bí àpẹẹrẹ Ó pàdée Dayọ̀), ọ̀rọ̀-ìṣe alápèpadà (bí àpẹẹrẹ, Kọ́bọ̀ ló kù mí kù), ọ̀rọ̀-ìṣe agbẹ̀rún (bí àpẹẹrẹ, Ó pè mí ní Olówó), ọ̀rọ̀-ìṣe aṣokùnfà (bí àpẹẹrẹ, Ó ní òun ń bọ̀) àti ọ̀rọ̀-ìṣe àsínpọ̀ (bí àpẹẹrẹ, Ó gbé ìjòkó wá sí ilé.).

Àwọn ọ̀nà tí a fi ń ṣẹ̀dá ọ̀rọ̀-orúkọ nínú èdè Yorùbá ni nípa lílo àfòmọ́-ìbẹ̀rẹ̀ (bí àpẹẹrẹ, sùn – àìsùn), nípa àpètúnpè ẹlẹ́bẹ (bí àpẹẹrẹ, jẹ - jíjẹ), nípa ṣíṣe àpètúnpè kíkún (bí àpẹẹrẹ, pẹja – pẹjapẹja, ọdún - ọdọọdún, abbl.)

Àwọn atọ́ka ibá-ìṣẹ̀lẹ̀ nínú èdè Yorùbá ni ibá-ìṣẹ̀lẹ̀ àṣetán (Olú ti lọ), ibá-ìṣẹ̀lẹ̀ atẹ́rẹrẹ (Olú ń lọ), àti ibá-ìṣẹ̀lẹ̀ bárakú (Adé máa ń lọ). Àwọn atọ́kà múùdù (ojúṣe) ni ojúṣe àníyàn[4] (Èmi yóò lọ), Ojúṣe wọ̀fún (Dàda lè lọ) àti ojúṣe kàn-ńpá (Adé gbọ́dọ̀ ṣe é).

Àwọn àpẹẹrẹ oríṣìíríṣìí gbólóhùn nínú èdè Yorùbá ni gbólóhù àṣẹ (Mú un wá), gbólóhùn àtẹnumọ́ (Mo ti dé o), gbólóhùn àkíyèsí alátẹnumọ́ (Aṣọ ni mo rà), gbólóhùn oníbọ̀ (Tí ẹ bá dé, ẹ pè mí), gbólóhùn àyísódì (Olú kò lọ) àti gbólóhùn alákànpọ̀ (Adé ra aṣọ ṣùgbọ́n kò rán an).

[1] Àríyànjiyàn sì wà lórí àwọn wúnrẹn tí a lè pè ní ọ̀rọ̀-atọ́kùn.

[2] Àríyànjiyàn sì wà lórí àwọn wúnrẹn tí a lè pè ní ọ̀rọ̀-àpọ́nlé.

[3] Gbogbo onímọ̀ gírámà èdè Yorùbá kọ́ nió gbà pé arọ́pò-orúkọ yìí wà nínú èdè Yorùbá.

[4] Àsìkò ọjọ́ iwájú ni àwọn onígírámà kan ń pe eléyìí.

Yoruba for Academic Purpose

Friday, 15 May 2015

Èdè Yorùbá ní Ṣókí

No comments:

Post a Comment